हेटौँडाः बागमती प्रदेशसभा सदस्य एव् राप्रपा बागमती प्रदेश संसदीय दलका उपनेता गिर बहादुर तामाङले सांसद र मन्त्रीहरु ठेकेदार बनिरहेको बताउनुभएको छ । उहाँले संसदीय भूमिका छाडेर प्रदेश सभा सदस्यहरु बजेटको हिसाब किताब र भागबण्डामा केन्द्रित भएको बताउनुभएको हो ।
मंगलबार बसेको प्रदेशसभाको बैठकमा प्रदेश सरकारको ६ वटा मन्त्रालयको विनियोजन माथि छलफल गर्नुहुँदै उपनेता तामाङले सांसदहरुले नागरिकलाई डिप्रेसनमा पुग्नेगरी टर्चर दिइरहेको आरोपसमेत लगाउनुभयो । उहाँले सांसदहरुलाई सर्कसको जोक्करसँग तुलना गर्नुभएको छ । ‘१३ जिल्लाका ११९ वटा पालिका रहेको बागमती प्रदेशमा हाम्रा मन्त्रीहरुले एउटा मात्र वडामा विकास बजेट पठाइएको छ । त्यसको लागि धन्यवाद । अहिले सांसद र मन्त्री ठेकेदार बनिरहेका छन् । संसदीय भूमिकामा रहने सांसदहरु बजेट कार्यक्रममा मात्र केन्द्रित भएको छ’, उहाँले भन्नुभयो, ‘सांसदहरुले बजेट मात्र ध्यान दिएर हुँदैन । नीति कानुन निर्माणमा सांसदको ध्यान दिन जरुरी रहेको छ ।’
उहाँले बजेट विनियोजनको समयमा भौगोलिक समानुपातिक विषयलाई ध्यान दिनुपर्ने बताउनुभयो । बजेट विनियोजन र विकास प्रणाली पौराणिक भागबण्डा भन्दा पनि डिजिटल युगको प्रयोगमा अग्रसर हुनुपर्ने उहाँको भनाई छ ।
