हेटौँडाः मकवानपुरको राक्सिराङ गाउँपालिका–७, दुगुवाङमा जङ्गली च्याउ खाएर गम्भीर बिरामी भएका दलबहादुर प्रजाको मृत्यु भएको छ । च्याउ खाँदा गम्भीर बिरामी भएका ५५ बर्षीय दलबहादुर प्रजाको उपचारको क्रममा आइतबार दिउँसो मृत्यु भएको वडा अध्यक्ष रामबहादुर प्रजाले जानकारी दिनुभएको छ ।
आइतबार बिहान ६ बजेको समयमा दल बहादुरले जङ्गलबाट ल्याएको च्याउ पकाएर खाँदा परिवारका ४ जना बिरामी छन् । जङ्गली च्याउ खाएर बिरामी परेका पाँचै जनालाई उपचारका लागि चितवन लगिएकोमा उपचारको क्रममा दल बहादुरको मृत्यु भएको हो । जङ्गली च्याउ खाँदा ४५ वर्षीया जालीमाया प्रजा, १५ वर्षीया रेन्जु प्रजा, ८ वर्षीया सविना प्रजा र १० वर्षीय सुसन प्रजा बिरामी भएको जिल्ला प्रहरी कार्यालय मकवानपुरले जनाएको छ । बिरामी चारै जनाको अवस्था सामान्य रहेको वडाअध्यक्ष प्रजाले जानकारी दिनुभएको छ ।
