हेटौंडाः पुर्व पश्चिम राजमार्ग अन्तर्गत मकवानपुरको मनहरी गाउँपालिकामा सवारी दुर्घटनामा ठक्करबाट एक जना महिलाको मृत्यु भएको छ । शुक्रबार बिहान मनहरी–९, रजैयास्थित पुर्व–पश्चिम सडक खण्डमा भारतीय सवारी (एलपीजी ग्यास बोकेको) ग्याँस बुलेटको ठक्करबाट एक महिलाको मृत्यु भएको जिल्ला प्रहरी कार्यालय मकवानपुरले जनाएको छ ।
प्रहरीका अनुुसार शुक्रबार बिहान चितवनबाट हेटौंडातर्फ आउँदै गरेको एएस–२५ डीसी ०२१२ नम्बरको भारतीय सवारी (ग्याँस बुलेट)ले विपरित दिशातर्फबाट जाँदै गरेको ग ७ प २३०४ नम्बरको मोटरसाइकललाई ठक्कर दिँदा दुर्घटना भएको जिल्ला प्रहरी कार्यालय मकवानपुरका प्रवक्ता एवम् प्रहरी नायव उपरिक्षक लक्ष्मी भण्डारीले जानकारी दिनुभयो ।
उहाँका अनुसार मृत्यु हुनेमा मोटरसाइकलमा सवार कास्कीको पोखरा महानगरपालिका–११ की ३३ वर्षिय निर्मला अधिकारी रहेकी छिन् । दुर्घटनामा मोटरसाइकलको पछाडी सवार अधिकारी गम्भीर घाइते हुनुभएको थियो । उनको उपचारको क्रममा हेटौंडा–११ स्थित चितवन मेडिकल कलेज चुरेहिल अस्पतालमा मृत्यु भएको प्रवक्ता भण्डारीले बताउनुभयो । दुर्घटनामा मृतक अधिकारीको टाउको र शरिरको विभिन्न भागमा चोट लागेको थियो ।
ग्यास बुलेटको ठक्करबाट मोटरसाइकल चालक ३१ वर्षीय सुवास गुरुङ घाइते हुनुभएको छ । उहाँको चितवन मेडिकल कलेज चुरेहिल अस्पताल हेटौंडामा उपचारका भइरहेको छ ।
ग्यासँ बुलेट चालक भारतको विहार राज्या पटियार थाना सदियान सुदमीका ३७ वर्षीय मनिन्द्र कुमार दासलाई नियन्त्रण लिइएको प्रवक्ता भण्डारीले बताउँनुभयो । घटनाबारे थप अनुसन्धान गरिरहेकोे उहाँको भनाई छ ।
