हेटौँडाः नेकपा एमाले मकवानपुरको जारी १२ औं अधिवेशनमा अध्यक्षका आकांक्षी रघुनाथ खुलालले उम्मेदवारी फिर्ता लिनुभएको छ । अध्यक्षका आकांक्षी खुलालले उम्मेदवारी फिर्ता लिनुभएसँगै अध्यक्षका आकांक्षीको संख्या ४ जनामा सीमित भएको छ ।
निर्वाचन समितिले अध्यक्ष पदमा ४ जनाको उम्मेदवारी कायम रहेको अन्तिम नामावली प्रकाशन गरेको छ । हिजो शनिवार साँझ ६ बजेसम्म निर्धारण गरिएको मनोनयन दर्ताको समयमा अध्यक्षमा ५ जनाले उम्मेदवारी दर्ता गरेका थिए । अध्यक्ष पदमा देवराज रिमाल, इन्द्रमान स्याङ्तान, श्रीधर पोखरेल र लालबहादुर थापाको उम्मेदवारी कायम रहेको हो । अध्यक्ष पदका आकांक्षी खुलालले आन्तरिक सहमतिका लागि उम्मेदवारी फिर्ता गरेको बताइएको छ । सहमतिका लागि तयारी गरिएपनि उम्मेदवारी फिर्ता गर्न कसैले इच्छा नदेखाएपछि खुलालले नाम फिर्ता लिनुभएको हो ।
उपाध्यक्ष पदका लागि परेको ४ जनाको उम्मेदवारी कायम रहेको छ भने सचिवमा ३ जना, उपसचिव खुलातर्फ ५ जना र उपसचिव महिलातर्फ ४ जनाको उम्मेदवारी कायम भएको छ । उपाध्यक्षमा हिदम लामा, सुनिल मोक्तान, ध्रुब चौलागाई र भरत दुलालको उम्मेदवारी कायम रहेको छ । सचिव पदमा ५ जनाको उम्मेदवारी परेकोमा ३ जनाको कायम रहेको छ । सचिव पदमा मदन कुमार दाहाल, सीता विष्ट र राजन थापाको उम्मेदवारी कायम भएको छ । सचिव पदमा उम्मेदवारी दिएका सुमित्रा काफ्ले, नरहरि महतले नाम फिर्ता लिएका हुन् ।
त्यस्तै उपसचिव खुलातर्फ ईन्द्रप्रसाद नेपाल, कृष्णप्रसाद चौलागाई, दीपक खड्का, फुर्वा दोर्जे लामा र खेमराज मगरको उम्मेदवारी कायम रहेको छ । उपसचिव महिलातर्फ कल्पना बलामी, जुना दाहाल, आरती पाठक र पार्वती रानाको उम्मेदवारी कायम रहेको छ । नेकपा एमाले मकवानपुरको जारी अधिवेशनमा ७ सय ७७ प्रतिनिधि सहभागी छन् । अधिवेशनबाट ५ पदाधिकारीसहित १ सय ५ सदस्यीय जिल्ला कमिटी चयन गर्नेछ ।
