हेटौंडाः जेठ २९ गतेदेखि असार ६ गतेसम्मको तालिकामा नसमेटिएका हेटौंडा उपमहानगरपालिकाका १ हजार ८ सय ४९ बालबालिकालाई दादुरा रुबेला विरुद्ध खोप लगाइने भएको छ । जेठ २९ गतेदेखि असार ६ गतेसम्म सञ्चालन भएको खोप कार्यक्रममा ११ हजार २६ बालबालिकालाई खोप लगाइएको हेटौंडा उपमहानगरपालिकाको आयुर्वेद तथा जनस्वास्थ्य शाखाले जनाएको छ ।
हेटौंडा उपमहानगरपालिकाले १२ हजार ८ सय ७५ जना बालबालिकालाई खोप लाउने लक्ष्य राखेकोमा त्यस मध्ये छुटेका १ हजार ८ सय ४९ बालबालिकालाई मंगलबार र बुधबार खोप लगाउन सुरु गरिएको आयुर्वेद तथा जनस्वास्थ्य शाखाका प्रमुख रमन झाले बताउनुभयो । उपमहानगरका १९ वटै वडाको १०६ वटा खोप केन्द्र मार्फत छुटेका बालबालिकालाई खोप लगाइने झाले बताउनुभएको छ ।
दादुरा रुबेला विरुद्धको खोप ९ महिनादेखि ५ वर्ष उमेर समूहका बालबालिकालाई लगाइन्छ । लकडाउनका कारण बजार क्षेत्रका बालबालिका अभिभावकसँगै गाउँ गएकाले धेरै बालबालिका छुटेको खोप कार्यक्रममा सहभागी स्वास्थ्यकर्मीको भनाइ छ ।
