हेटौंडाः मकवानपुर जिल्लाको मकवानपुरगढी गाउँपालिकाले पालिकामा एक दिने गाउँ शिक्षा योजना निर्माणसम्बन्धी कार्यशाला सम्पन्न गरेको छ । बिहीबार मकवानपुरगढी गाउँपालिकाको आयोजनामा शैक्षिक सत्र २०८१ का लागि क्षमता अभिवृद्धि तथा शिक्षासम्बन्धी कार्ययोजना निर्माण कार्यशाला सम्पन्न भएको गाउँपालिकाका शिक्षा सहजकर्ता कमल फुयाँलले जानकारी दिनुभयो ।
कार्यशालामा बालविकास कक्षा, आधारभूत तह, माध्यमिक तह, प्राविधिक तह, विपद जोखिम व्यवस्थापन, समावेशी शिक्षा, शिक्षक व्यवस्थापनमा केके क्रियाकलाप राख्ने भन्ने विषयमा छलफल भएको उहाँले जानकारी दिनुभयो । कार्यशालामा २० वटा विद्यालयका शिक्षकहरुसँग छलफल भएको थियो । कार्यक्रममा प्रारम्भिक बालविकास सहजकर्ता ५ जना रहनुभएको थियो भने आधारभूत तहका ३, प्राथमिक तहका २ र माध्यमिक तहका १० जना गरी १५ जना प्रधानाध्यापक सहभागी रहनु भएको फुयाँलले जानकारी दिनुभयो ।
बागमती प्रदेश सरकारबाट अनिवार्य तथा निःशुल्क शिक्षा लागू भएको स्थानीय तह घोषणा कार्यक्रमका लागि मकवानपुरगढी गाउँपालिका छनौट भएको छ । मकवानपुरगढी गाउँपालिकामा २०८१ जेठ मसान्तभित्र अनिवार्य तथा निःशुल्क शिक्षा लागू गर्न कार्ययोजना बनाएर प्रक्रिया अगाडि बढाएको पालिकाका शिक्षा शाखा प्रमुख राम घलानले जानकारी दिनुभयो ।
कार्यशालामा मकवानपुरगढी गाउँपालिकाका अध्यक्ष दोर्जे लामा स्याङ्तानको सभाध्यक्षता तथा पालिकाको शिक्षा शाखाका प्रमुख राम घलानको प्रमुख आतिथ्य रहेको थियो । कार्यशालामा गाउँपालिकाका स्रोत शिक्षक दाशरथि उपाध्याय र प्राविधिक सहायक भगवती घिमिरेको आतिथ्य थियो । कार्यशालाको सहजीकरण फ्यूचर नेपालका नवराज थापाले गर्नुभएको थियो ।
