हेटौंडाः मकवानपुर जिल्लाको मकवानपुरगढी गाउँपालिकाले पालिकामा रहेका ३७ वटा विद्यालयका विद्यालय व्यवस्थापन समिति (विव्यस) अध्यक्षहरूका लागि शिक्षा ऐन तथा नियमावलीसम्बन्धी अभिमुखीकरण कार्यक्रम सम्पन्न गरेको छ । बुधबार गाउँपालिकाको शिक्षा शाखाको आयोजनामा भएकोे एक दिने क्षमता अभिवृद्वि अभिमुखीकरण कार्यक्रम सम्पन्न हो ।
गाउँपालिकाले २०८५ सालभित्र अनिवार्य तथा निःशुल्क शिक्षा लागू गर्ने कार्ययोजना बनाएको चण्डिका माध्यमिक विद्यालयका प्रधानाध्यापक कमल फुयाँलले जानकारी दिनुभयो । अभिमुखीकरण कार्यक्रममा शिक्षा ऐन तथा नियमावलीमा भएका नीतिगत व्यवस्थाका साथै विव्यसको काम, कर्तव्य, अधिकारबारे छलफल भएको छ । कार्यक्रममा शैक्षिक सत्र २०८१ को कार्यविधि र गाउँ शिक्षासँग सम्बन्धित विषयमा समेत अभिमुखीकरण गरिएको बताइएको छ ।
कार्यक्रममा शिक्षकहरुसँग पनि कार्यसम्पादन सम्झौताबमोजिम काम र कार्यान्वयन सहजीकरणका लागि अनुरोध गरिएको छ । साथै, शिक्षक सरुवा कार्यविधिको प्रारम्भिक मस्यौदामाथि छलफल भएको प्रधानाध्यापक फुयाँलले जानकारी दिनुभयो ।
कार्यक्रममा मकवानपुरगढी गाउँपालिका–१ का वडा अध्यक्ष एवम् सामाजिक विकास समिति संयोजक आइत सिंह लोको सभाध्यक्षता तथा गाउँपालिकाका प्रमुख दोर्जे लामा स्याङ्तानको प्रमुख आतिथ्य रहेको थियो । कार्यक्रममा गाउँपालिकाका उपाध्यक्ष मानकुमारी पाख्रिन नेपाली र शिक्षा युवा तथा खेलकुद शाखा प्रमुख रामबहादुर घलानको विशेष आतिथ्यमा रहेको प्रधानाध्यापक फुयाँलले जानकारी दिनुभयो ।
