हेटौँडाः हेटौँडा उपमहानगरपालिकाको चालु आर्थिक वर्षको अनुमानित आयमा ३० करोड रुपैयाँले कमि आउने प्रक्षेपण गरिएको छ । संघीय र प्रदेश सरकारले दिने अनुदान, राजश्व बाँडफाँड र आन्तरिक आयमा कमि आउने निश्चित भएको उपमहानगरका अधिकारीको भनाइ छ । २ अर्ब ९० करोडको बजेट बनाएको उपमहानगरले झण्डै ३० करोड रुपैयाँ कम आम्दानी हुने निश्चित भएपछि खर्च कटौतिका लागि वडालाई पत्राचार गरिसकेको छ ।
हेटौँडा उपमहानगरपालिकाको वित्त व्यवस्थापन महाशाखाका प्रमुख अनिरुद्र नेपालकाअनुसार संघीय सरकारको समानीकरण अनुदान, घरजग्गा रजिष्ट्रेसन, मूल्य अभिवृद्धि कर, सवारीसाधन कर र नदीजन्य पदार्थको विक्रीबाट हुने आम्दानीमा उल्लेख्य कमि हुने अनुमान गरिएको छ । फागुन मसान्तसम्मको आयको अवस्थालाई विश्लेषण गर्ने क्रममा उपमहानगरको प्रस्तावित आयमा करिब ३० करोड रुपैयाँले कमि आउने अनुमान गरिएको महाशाखा प्रमुख नेपालले जानकारी दिनुभयो ।
उपमहानगरपालिकाले चालु आर्थिक वर्षमा २ अर्ब ९० करोड रुपैयाँ आम्दानी हुने अनुमान गरेको छ । फागुन महिनासम्ममा १ अर्ब ९० करोड रुपैयाँ मात्रै आम्दानी भएको छ । “आम्दानी कम हुने भएपछि खर्च व्यहोर्न गाह्रो हुने विषयमा कार्यपालिका बैठकमा नै जानकारी गराइसकेका छौं” महाशाखा प्रमुख नेपालले भन्नुभयो, “चैत २ गतेको कार्यपालिका बैठकपछि चै ७ गतेको मितिमा वडामा परिपत्र गरेर तालिम, भ्रमण, अभिमुखीकरण जस्ता कार्यक्रम रोक्न भनिएको छ ।”
संघीय सरकारबाट समानीकरण अनुदानमा ३१ करोड प्राप्त हुने अनुमान गरिएकोमा फागुन मसान्तसम्म २३ करोड २८ लाख रुपैयाँ प्राप्त भएको छ । घरजग्गा रजिष्ट्रेसनवापत २८ करोेड ८६ लाख रुपैयाँ आम्दानी हुने अनुमान गरिएकोमा ९ करोड ५७ लाख रुपैयाँ मात्र आम्दानी भएको छ । मूल्य अभिवृद्धि करवापत २१ करोड ६२ लाख रुपैयाँ आम्दानी हुने अनुमान गरिएकोमा फागुन मसान्तसम्ममा ६ करोड २६ लाख रुपैयाँ मात्रै आम्दानी भएको छ ।
सवारी साधन करबाट हुने आम्दानीमा पनि उल्लेख्य कमि आउने देखिएको छ । १० करोड ७३ लाख रुपैयाँ आम्दानी हुने अनुमान गरिएकोमा ३ करोड ११ लाख रुपैैयाँ मात्रै आम्दानी भएको छ । यस्तै नदीजन्य पदार्थको विक्रीबाट ५ करोड रुपैयाँ आम्दानी हुने अनुमान गरेको हेटौँडा उपमहानगरपालिकाले फागुन मसान्तसम्ममा १७ लाख रुपैयाँ मात्रै आम्दानी गर्न सकेको छ ।
महाशाखा प्रमुख नेपालका अनुसार समानीकरण अनुदानमा ६ करोड, घरजग्गा रजिष्ट्रेसन करमा ८ करोड, मूल्यअभिवृद्धि करमा ६ करोड, सवारी साधन करमा २ करोड र नदीजन्य पदार्थबाट ४ करोड रुपैयाँले कम आम्दानी हुने अनुमान गरिएको छ । आर्थिक महाशाखाका अधिकारीले हेटौँडा उपमहानगरपालिकाको कार्यपालिका बैठकमा चालु आर्थिक वर्षमा अनुमान गरिएको ३० करोड रुपैयाँ बजेट कम हुने निश्चित भएकोले चालु योजनाको भुक्तानी समेत दिन कठिन हुने स्पष्ट पारेका छन् । चालु योजनाका भुक्तानी दिन सुरु गरियो भने उपमहानगर गम्भीर आर्थिक संकटमा पर्ने चेतावनी समेत दिएको छ ।
