हेटौंडाः कक्षा ११–१२ स्तरीय वक्तृत्वकला प्रतियोगितामा जेनिथ इन्टरनेशनल माविकी छात्रा अभिप्सा पौडेल प्रथम भएकी छिन् । ११४ औं अन्तराष्ट्रिय श्रमिक महिला दिवसको अवसरमा जिल्ला अदालत बार एसोसिएसन मकवानपुर र गैरसरकारी संस्था महासंघ नेपाल जिल्ला शाखा मकवानपुरको संयुक्त आयोजनामा भएको वक्तृत्वकलामा पौडेल प्रथम भएकी हुन् ।
नेतृत्वमा महिलाको अधिकार, अवसर र चुनौती विषयक वक्तृत्वकला प्रतियोगितामा आधुनिक राष्ट्रिय माविका धिरज यादव द्वितीय भएका छन् । नारायणी कलेजकी छात्रा साक्षी भुजेल तृतीय र मकवानपुर बहुमुखी क्याम्पसकी शर्मिला उप्रेती सान्त्वना भइन् । प्रथम, द्वितीय, तृतीय र सान्त्वना हुनेलाई नगदसहित प्रमाणपत्र प्रदान गरिएको थियो । प्रतियोगिताका सहभागीलाई प्रमाणपत्र प्रदान गरिएको थियो ।
प्रतियोगितामा ६ विद्यालयका ११ जना विद्यार्थीहरुको सहभागिता रहेको थियो । जेनिथ इन्टरनेशनल मावि, नारायणी कलेज, आधुनिक राष्ट्रिय मावि, मकवानपुर बहुमुखी क्याम्पस, जनज्योति मावि र जनप्रिय माविले प्रतियोगितामा सहभागिता जनाएका थिए । वक्तृत्वकला प्रतियोगितामा अनिता न्यौपाने, कृष्णप्रसाद पोखरेल, विशाल अधिकारीले निर्णायकको भूमिका निर्वाह गरेका थिए ।
हेटौंडा उपमहानगरपालिका ११ नम्बर वडा अध्यक्ष जुना दाहालको प्रमुख आतिथ्य एवम् गैरसरकारी संस्था महासंघ नेपाल जिल्ला शाखा मकवानपुर अध्यक्ष रमिला सापकोटाको सभाध्यक्षतामा कार्यक्रम भएको हो । कार्यक्रममा बुद्धशरण लामा, अधिवक्ता अप्सरा बस्नेत, रामचन्द्र न्यौपाने, सन्तोष पौडेल, कुमारी वाइवा, सर्मिला श्रेष्ठ, मन लामा, शिवा दोवकोटा, प्रमिला केसी, पार्वती चौलागाई, गोकर्ण तिवारीलगायतको सहभागिता रहेको थियो ।
