हेटौंडाः मकवानपुरको बकैया–५ मा रहेको गीतावर आधारभूत विद्यालयका विद्यार्थीलाई शैक्षिक तथा खेल सामग्री हस्तान्तरण गरिएको छ । बुधबार सरस्वती पूजाको अवसरमा विद्यालयमा उपस्थित भई पुल्चोक इन्जिनियरिङ कलेजमा अध्ययनरत काठमाडौं भ्याली लियो क्लबका पदाधिकारीहरुले विद्यालयलाई शैक्षिक तथा खेल सामग्री हस्तान्तरण गरेको प्रधानाध्यापक हरिहर खनालले जानकारी दिनुभयो ।
क्लबमा आवद्ध विद्यार्थीहरुले पुस्तकालयका लागि एक हजार पुस्तक, ब्याडमिन्टन, भलिबल, फुटबलका साथै अन्य सामग्रीहरु हस्तान्तरण गरेका थिए । विद्यालयले विद्यार्थीहरुका लागि सामान्य होस्टेलको समेत व्यवस्था गरेको छ । होस्टेलमा हाल ३७ जना विद्यार्थी रहेका छन् ।
कक्षा ८ सम्म पठनपाठन हुने विद्यालयमा १ देखि ४ सम्म अंग्रेजी माध्यममा पठनपाठन हुने गरेको छ । विद्यालयमा अंग्रेजी र नेपाली माध्यम गरेर हाल २ सय ४९ जना विद्यार्थीहरु अध्ययनरत छन् । यसवर्ष कक्षा ८ को परीक्षा दिने ३१ जना विद्यार्थी रहेको प्रधानाध्यापक खनालले जानकारी दिनुभयो ।
विद्यालयमा पर्याप्त शिक्षक नभएका कारण पठनपाठनमा समस्या हुने गरेको, घेराबारको उचित व्यवस्था नहुनाले जंगली जनावरले विद्यालयमा दुःख दिने गरेको र विद्यालय भवनको आवश्यकता रहेको उहाँले जानकारी दिनुभयो । विद्यालयलाई २०७३ सालमा प्लान नेपालले १० कोठे भवनको लागि सहयोग गरेको थियो । यस्तै, स्थर बेन्जामिन स्मृति संस्थाको सहयोगमा अहिले खानेपानी इनार, ट्याङ्कीलगायत खानेपानीसम्बन्धी काम भइरहेको छ ।
यस्तै, रेस्ट नेपालको सहयोगमा कक्षा १ देखि १२ सम्मका ४३ जना विद्यार्थीलाई कक्षा १२ सम्म पढ्नका लागि शैक्षिक सामग्रीदेखि सम्पूर्ण खर्च सहयोग गरिरहेको छ । यस आर्थिक वर्षमा नै एसियन पेन्ट्सले २ लाखको रङ सहयोग गरेको प्रधानाध्यापक खनालले जानकारी दिनुभयो ।
