हेटौँडाः बागमती प्रदेश सरकारका आन्तरिक मामिला तथा कानुनमन्त्री गंगानारायण श्रेष्ठले सवारीमैत्री सडक नहुँदा सवारी दुर्घटना बढिरहेको बताउनुभएको छ । बिहिबार हेटौँडामा प्रदेशस्तरीय ट्राफिक सप्ताहको उद्घाटन गर्नुहुँदै उहाँले भौगोलिक अवस्थाअनुसार देशको सडक सवारीमैत्री नभएकोले दुर्घटना भइरहेको बताउनुभएको हो ।
उहाँले सडक नियमलाई पालना नगर्नु पनि दुर्घटनाको अर्को कारण भएको बताउनुभयो । उहाँले पट्रदेश सरकारले चाँडै जोखिमयुक्त सडकहरुमा सीसी टिभी जडान र साँकेतिक चिन्हहरु राखेर दुर्घटना न्युनीकरणका लागि काम गर्ने बताउनुभयो । यसका लागि कार्यविधिसमेत बनिसकेको उहाँले बताउनुभयो । अहिले मृत्युको प्रमुख कारण नै सवारी दुर्घटना भएको उहाँले बताउनुभयो । यसको मुख्य कारण ट्राफिक नियमको पालना नगर्नु रहेको बताउनुहुँदै नियमितरुपमा सवारी साधनको प्राविधिक जाँच गर्नुपर्ने बताउनुभयो । उहाँले ट्राफिक उपकरण खरिदका लागि प्रक्रिया अगाडि बढाउन सरकारले अनुमति दिइसकेको जानकारी दिनुभयो ।
अहिले कतिपय अवस्थामा नबुझेर र कसैले भने बुझेरै ट्राफिक नियमको उल्लंघन गरिरहेको उहाँको भनाई छ । नागरिकले ट्राफिकका लागि नभई आफ्ना लागि नियमको गम्भीरतापूर्वक पालना गर्न मन्त्री श्रेष्ठले आग्रह गर्नुभयो । प्रदेश सरकारले सडक सचेतना सम्बन्धी जनचेतनामूलक कार्यक्रम अगाडि बढाउन सहयोग गर्ने उहाँले बताउनुभएको छ ।
यस्तै बागमती प्रदेश प्रहरी कार्यालय हेटौँडाका प्रमुख प्रहरी नायव महानिरीक्षक विष्णु कुमार केसीले सडकमा हुने दुर्घटना कम गर्न सबैको भूमिका उत्तिकै रहने बताउनुभएको छ । उहाँले ट्राफिक प्रहरीलाई समयअनुसारको प्रविधिमा जोड्दै अगाडि लैजान आवश्यक रहेको बताउनुभयो । बागमती प्रदेशको उपत्यकाका तीन जिल्ला बाहेक अन्य १० जिल्लामा चालु आर्थिक वर्षका पौष मसान्तसम्म १ हजार ९ सय ९४ सवारी दुर्घटना हुँदा १ सय ६६ जनाको मृत्यु भएको छ । जसमध्ये मकवानपुरका २३ जना रहेका छन् । ट्राफिक सप्ताह आगामी फागुन २ गतेसम्म चल्नेछ । कार्यक्रममा बागमती प्रदेशका श्रम तथा यातायातमन्त्री लक्ष्मण लम्साल र मकवानपुरका प्रमुख जिल्ला अधिकारी सूर्य बहादुर सेडाई लगायतको आतिथ्य रहेको थियो ।
