हेटौँडाः हेटौँडा–१० स्थित ज्ञानदा माध्यमिक विद्यालयको ५२ औँ वार्षिकोत्सव सम्पन्न भएको छ । शुक्रबार वडाध्यक्ष फुर्वा दोर्जे लामाको प्रमुख आतिथ्य तथा विद्यालय व्यवस्थापन समितिका अध्यक्ष पुष्पराम थापाको अध्यक्षतामा वार्षिकोत्सव समारोह भएको हो । वार्षिकोत्सवको अवसरमा शिक्षक, कर्मचारी, विद्यार्थी, पूर्व शिक्षक, व्यवस्थापन समितिका पूर्वअध्यक्षहरुलाई सम्मान गरेको छ ।
वार्षिकोत्सवको अवसरमा विद्यालयले विविध कार्यक्रमको आयोजना गरेको थियो । वार्षिकोत्सवको अवसरमा विद्यार्थीले नृत्य, गायन तथा नाट्यकला प्रस्तुत गरेका थिए भने विविध क्रियाकलापमा सहभागी विद्यार्थीलाई पुरस्कृत गरिएको थियो । शैक्षिक सत्र २०७९ को वार्षिक परीक्षामा प्रथम, द्वितीय र तृतीय हुने विद्यार्थीलाई पनि पुरस्कृत गरिएको थियो । विद्यालयले विद्यालय व्यवस्थापन समितिका पूर्वअध्यक्षहरु, पूर्व शिक्षक, कर्मचारी, कार्यरत शिक्षक, कर्मचारीलाई पनि सम्मान गरेको छ ।
विद्यालयका सहायक प्रधानाध्यपक रमा अधिकारीले शैक्षिक वर्ष २०७९ सालमा वडाको सहयोगमा ३ वटा कम्प्युटर, स्मार्ट टिभी र सबै कक्षामा सीसी क्यामेरा जडान गरेको जानकारी गराउनुभयो । हेटौंँडा उपमहानगरपालिकाबाट अक्षयकोष वृद्धिका लागि २ लाख ५० हजार रुपैयाँ प्राप्त भएको उहाँले बताउनुभयो ।
विद्यालयले कक्षा–४ सम्म अंग्रेजी माध्यमबाट पठनपाठन भइरहेको छ । उहाँले आगामी दिनमा बालमैत्री फर्निचरहरुको व्यवस्था गर्दै अंग्रेजी माध्यमलाई क्रमशः माथिल्लो कक्षाहरुमा विस्तार गर्दै जानुपर्ने बताउनुभयो । अभिभावकसँग निरन्तर सम्पर्क गरी विद्यालय छाड्ने दर कम गर्नुपर्ने, शैक्षिक सामग्री निर्माणसम्बन्धी तालिमको व्यवस्था गर्नुपर्ने र प्राविधिक शिक्षाको थालनी गनुपर्ने अधिकारीले बताउनुभयो ।
गत शैक्षिक सत्रमा विद्यालयमा ३०९ जना विद्यार्थी भर्ना भएका मध्ये २३१ जना परीक्षामा सहभागी भएको र २०९ जना विद्यार्थी परीक्षामा उत्तीर्ण भएको उहाँले जानकारी दिनुभयो । चालु शैक्षिक वर्ष २०८० मा ३ सय ८ जना विद्यार्थी भर्ना भएका छन् ।
