हेटौंडाः मकवानपुरगढी गाउँपालिका–३, मक्रान्चुलीस्थित भानु माध्यमिक विद्यालयमा विद्यालय व्यवस्थापन समितिका लागि निर्वाचन हुने भएको छ । आइतबार भएको अभिभावक भेलाले २ जना महिला र २ जना खुला सदस्यमा सर्वसम्मत चयन गर्न नसकेपछि निर्वाचन हुन लागेको विद्यालयका प्रधानाध्यापक राजेन्द्र थापाले जानकारी दिनुभयो ।
व्यवस्थापन समिति सदस्यका लागि १० जना अभिभावकको उम्मेदवारी परेको छ । अभिभावकहरु श्यामबहादुर पाख्रिन, लक्ष्मण भट्टराई, दिलिप लोप्चन, सावित्री दुलाल, रुक्मणि ढुङ्गाना, हेमबहादुर योञ्जन, सन्तु थिङ पाख्रिन, हेमकुमारी सञ्जेल, उमेश अधिकारी र खिलप्रसाद चौलागाईको उम्मेदवारी परेको हो ।
निर्वाचन कार्यक्रमअनुसार मंगलबार उम्मेदवारी दर्ता तथा नामावली प्रकाशन, बुधबार उम्मेदवारी फिर्ता, बिहीबार दाबी बिरोध, अन्तिम नामावली प्रकाशन र चुनाव चिन्ह वितरण गरिनेछ । आइतबार बिहान ११ बजेदेखि २ बजेसम्म निवार्चन हुनेछ र सोही दिन नतिजा प्रकाशन गरिने प्रधानाध्यापक थापाले जानकारी दिनुभयो । कक्षा १२ सम्म पठनपाठन हुने विद्यालयमा हाल ५ सय २५ जना विद्यार्थी अध्ययनरत रहेका छन् ।
