हेटौंडाः मानव बेचविखन तथा ओसारपसार विरुद्धको बागमती प्रदेशस्तरीय संरक्षण नीतिको प्रचार तथा आगामी कार्यदिशासम्बन्धी अभिमुखीकरण कार्यक्रम भएको छ । बुधबार बागमती प्रदेशको सामाजिक विकास मन्त्रालयको आयोजना तथा एसिया फाउन्डेसन, अष्ट्रेलियन एड, महिला कानुन र विकास मञ्चको संयुक्त सहकार्यमा अभिमुखीकरण भएको हो ।
कार्यक्रममा कार्यपत्र प्रस्तुत गर्नुहुँदै सामाजिक विकास महाशाखा प्रमुख गोपालप्रसाद कँडेलले नीतिको बारेमा जानकारी गराउनुभयो । प्रदेशले थप उत्तरदायी भएर मानव बेचविखन तथा ओसारपसारमुक्त प्रदेश बनाउन नीति लागू गरिएको उहाँले बताउनुभयो । उहाँले अन्य प्रदेशको तुलनामा बागमती प्रदेशमा बालबालिका बढी हराउने गरेको बताउनुभयो । श्रमलगायतका शोषणाका कारण जोखिममा रहेका महिला तथा बालबालिकाहरुलाई मनोसामाजिक, आर्थिक तथा कानुनीरुपमा सशक्तिकरण गर्न चुनौती रहेको कँडेलले बताउनुभयो ।
पुनः स्थापनाका लागि स्थापित सेवा सुविधालाई प्रभावकारी बनाएर पुनः मिलनका कार्यक्रमअन्तर्गत् अभिभावक सचेतीकरणलाई प्राथमिकता दिन आवश्यक रहेको उहाँले बताउनुभयो । बागमती प्रदेश सरकारले नीति कार्यान्वयन गर्न आवश्यक ऐन, नियम, निर्देशिका र कार्यविधि बनाउन सक्ने उहाँले बताउनुभयो । नीतिको कार्यान्वयनको जिम्मेवारी प्रदेश सरकार हुने उहाँले बताउनुभयो ।
कार्यक्रममा बागमती प्रदेशको सामाजिक विकास महाशाखाका महिला विकास अधिकृत चन्द्रकुमारी व्यञ्जनकार र कानुन र विकास मञ्चका निर्देशक अधिवक्ता सविन श्रेष्ठले पनि आ–आफ्नो कार्यपत्र प्रस्तुत गर्नुभएको थियो । कार्यक्रममा बोल्नुहुँदै माइती नेपाल मकवानपुरकी संयोजक माया लामाले पछिल्लो समय मानव बेचविखनको स्वरुप बदलिँदो अवस्थामा रहेको बताउनुभयो । पहिलाभन्दा फरक ढङ्गले मानव बेचविखन भइरहेको उहाँले बताउनुभयो । अहिले वास्तविक पीडितको पहिचान नभइरहेको अवस्था रहेको उहाँको भनाइ छ । उहाँले पीडितहरुले समयमै क्षतिपूर्ति पनि पाउन नसकिरहेको बताउनुभयो ।
कार्यक्रममा बागमती प्रदेशसभा सदस्य प्रेमबहादुर पुलामी, हेटौंडा उपमहानगरपालिकाकी प्रमुख मीनाकुमारी लामा, प्रदेश बाल अधिकार समितिका सदस्य प्रकाश खतिवडा, गैरसरकारी संस्था महासंघ बागमती प्रदेशकी अध्यक्ष आरती पाठकलगायत सुरक्षा निकाय र सरोकारवाला निकायका प्रतिनिधिहरुको उपस्थिति रहेको थियो ।
