हेटौंडाः मकवानपुर जिल्लाको पूर्विक्षेत्रस्थित बागमती गाउँपालिकाले शिक्षामा सुधारका लागि महत्वपूर्ण कार्य गरिरहेको छ । गाउँपालिकाले गत शैक्षिक सत्र २०७६ मा ३१ जना शिक्षक नियुक्त गरी पालिकाका सबै विद्यालयमा विद्यार्थी र शिक्षकको अनुपात मिलाएको थियो । चालु आर्थिक वर्षभित्रै पालिकाका दुई विद्यालयलाई विद्यालय बस खरिद गर्ने प्रक्रिया अन्तिम चरणमा पुगेको छ ।
बागमती गाउँपालिकाले वडा नम्बर ५ ज्यामिरेस्थित देवकी मावि र वडा नम्बर ८, फापरबारीस्थित जनता माविका लागि विद्यालय बस गरिद गर्दैछ । माथिल्लो तहमा अध्ययन गर्ने विद्यार्थीको सुविधाका लागि पालिकाले बस उपलब्ध गराउन लागेको अध्यक्ष सर्केश घलानले जानकारी दिनुभएको छ । आधारभूत तहअन्तर्गत ५ कक्षा, ८ कक्षा उत्तीर्ण भएपछि माथिल्लो तहको शिक्षा लिन नजिकै विद्यालय नभएका र विद्यालय नजिक कोठा भाडामा लिएर अध्ययन गर्ने अवस्था नभएका विद्यार्थीको सहजताका लागि पालिकाले विद्यालयलाई बस उपलब्ध गराउन लागेको जनाएको छ ।
गाउँपालिकाले गत शैक्षिक सत्रमा विद्यार्थीको अनुपातमा शिक्षक उपलब्ध गराउन ३१ जनालाई पालिकाकै बजेटमा करारमा नियुक्त गरेको छ । वर्षौदेखि निमावि तह सञ्चालनमा रहे पनि दरबन्दी पाउन नसकेका, मावि तहमा विषयगत दरबन्दी नभएका क्षेत्र लक्षित गरी पालिकाले १ करोड रुपैयाँ बजेट विनियोजन गरी करारमा शिक्षक नियुक्त गरेको गाउँपालिकाका शिक्षा शाखाका सहायक प्रमोद राईले जानकारी दिनुभयो । गाउँपालिकाले मावि तहमा ६ जना, निमावि तहमा १६ जना, प्रावि तहमा ८ जना र प्रारम्भिक बालविकास कक्षामा एक जना शिक्षक नियुक्त गरेको छ । गाउँपालिकाले आफ्नै बजेटमा नियुक्त गरेका ३१ जना शिक्षकलाई चालु शैक्षिक सत्रमा पनि नियमित गर्ने जनाएको छ । साथै आगामी आर्थिक वर्षमा पनि थप विद्यालयलाई आवश्यकताअनुसार विद्यालय बस उपलब्ध गराउन गाउँपालिका सकारात्मक रहेको राईको भनाइ छ ।
निर्वाचित भएर आएपछि गाउँपालिकाले शिक्षाको सुधारका लागि शिक्षकहरुको भेला गराई सुझाव संकलन गरेको थियो । बागमती गाउँपालिकामा ५ वटा माविसहित ५० वटा सामुदायिक विद्यालय छन् भने एउटा निजी विद्यालय रहेको राई बताउनुहुन्छ । बागमती गाउँपालिकामा करिब ८ हजार बालबालिका विद्यालय तहमा अध्ययनरत छन् ।
