हेटौंडाः पूर्वी मकवानपुरको बकैया गाउँपालिकामा मंगलबारदेखि पालिकास्तरीय गोल्डकप फुटबल प्रतियोगिता सुरु हुने भएको छ । प्रतियोगिताको लागि तयारी पूरा भएको पालिकाका खेलकुद विकास समिति अध्यक्ष विजय लामा थिङले बताउनुभयो ।
प्रतियोगिताको मंगलबार नेपाल सरकारका खेलकुदमन्त्री डिगबहादुर लिम्बुले उद्घाटन गर्नुहुने भएको छ । यसअघि प्रतियोगिता सोमबारबाट सुरु गर्ने भनिए पनि एक दिन पछि सारेर मंगलबारदेखि आयोजना गर्न लागेको उहाँले बताउनुभयो । बकैया–३ स्थित हात्तीसुँडेमा हुने प्रतियोगिता बिहान ११ बजेदेखि सुरु हुनेछ । प्रतियोगिताको खेल तालिका शनिबार सार्वजनिक गर्ने उहाँले बताउनुभयो ।
प्रतियोगितामा पालिकाका १२ वटै वडाको टिमको सहभागिता रहने जनाइएको छ । प्रतियोगितामा सिनियर र जुनियर टिमको सहभागिता रहनेछ । प्रतियोगिताको फाइनल खेल पुस २९ गते हुनेछ । प्रतियोगितामा सिनियर र जुनियर टिमको विजेताले एक–एक लाख रुपैयाँसहित शिल्ड, मेडल तथा प्रमाणपत्र प्राप्त गर्नेछन् भने उपविजेता टिमले नगद ५० हजार रुपैयाँ प्राप्त गर्नेछन् ।
