हेटौँडाः हेटौँडा–१८ स्थित कमला आधारभूत विद्यालयको शुक्रबार ४८ औ वार्षिकोत्सब एवम् अभिभावक भेला सम्पन्न भएको छ । विद्यालय व्यवस्थापन समितिका अध्यक्ष तोयानाथ तिमल्सिनाको सभाध्यक्षता तथा वडा अध्यक्ष अनिल कुमार बानियाँको प्रमुख आतिथ्यमा भएको कार्यक्रममा विद्यालयका शैक्षिक गतिविधिहरु साथै आगामी योजनाका विषयमा विद्यालयका प्रधानाध्यापक गोविन्द उप्रेतीले जानकारी गराउनुभएको थियो ।
विद्यालयले पछिल्लो समयमा शैक्षिक, भौतिक पक्षमा सुधार गर्दै गएको र आगामी दिनमा अझै शैक्षिक गुणस्तर वृद्धि हुने वडा अध्यक्ष बानियाँले विश्वास व्यक्त गर्नुभएको छ । वार्षिकोत्सवको कार्यक्रमको अवसरमा आयोजित सप्ताहव्यापी खेलकुद प्रतियोगितामा विजयी विद्यार्थीलाई पुरस्कृत समेत गरिएको थियो । विषयगत उत्कृष्ट नतीजा हासिल गर्ने शिक्षकहरुलाई पनि पुरस्कृत गरिएको थियो । कार्यक्रममा निवर्तमान प्रधानाध्यापक कुमार प्रसाद अधिकारी र सेवानिवृत्त हुनुभएका शिक्षक सीमा बानियाँलाई सम्मान गरिएको थियो ।
