हेटौंडाः मकवानपुर जिल्लाको मकवानपुरगढी गाउँपालिकाले आगामी आर्थिक वर्ष २०७७/७८ का लागि ४८ करोड हाराहारीमा बजेट ल्याउने तयारी गरिरहेको छ । आगामी आर्थिक वर्षको नीति तथा कार्यक्रमका बारेमा गाउँपालिकाले पठाएको सिलिङको आधारमा बस्तीस्तरबाट हाल वडास्तरमा छलफल चलिरहेको छ । गाउँपालिकाले प्रत्येक वडालाई ७० लाखको सिलिङ पठाएको छ । गाउँपालिकाले आगामी आर्थिक वर्षमा विदेशबाट आएका र यहिँ भएका युवाहरुलाई लक्षित गरेर कृषि र पशुपालनलाई उच्च प्राथमिकतामा राखेर बजेट ल्याउने गाउँपालिकाका अध्यक्ष विदुर हुमागाईले बताउनुभयो ।
कृषि, स्वास्थ्य र शिक्षालाई प्राथमिकतामा राखेर नीति तथा कार्यक्रम तयार पार्दा पुर्वाधारमा नै धेरै बजेट लाग्ने अध्यक्ष हुमागाईले जानकारी दिनुभयो । गाउँपालिकाले बाँझो जमिनमा खेती गर्न पे्ररित गर्ने, सम्पूर्ण जनतालाई उत्पादनमा जोड्ने लगायतका विषयहरुलाई आर्थिक वर्षको नीति तथा कार्यक्रममा समेटिने जानकारी दिएको छ । आगामी आर्थिक वर्षको बजेट गत वर्षको समानन्तरमा आउने अध्यक्ष हुमागाईले बताउनुभयो ।
यस वर्ष गाउँपालिकाको राजस्व गत वर्षको तुलनामा घटेको र वित्तीय समानीकरण तर्फको बजेट भने बढेको गाउँपालिकाका प्रमुख प्रशासकीय अधिकृत रामकुमार पुडासैनीले जानकारी दिनुभयो । गाउँपालिकामा संघीय सरकारले आगामी आर्थिक वर्षका लागि वित्तीय समानीकरणतर्फ ९ करोड ८९ लाख बजेट विनियोजन गरेको छ । त्यस्तै सशर्त अनुदानतर्फ २० करोड ४४ लाख, राजस्व तर्फ ७ करोड ६४ लाख र विशेष अनुदानतर्फ २ करोड २६ लाख बजेट विनियोजन गरेको छ । गाउँपालिकाले बागमती प्रदेशको विभिन्न मन्त्रालयबाट २ करोड ३० लाख ५० हजार बजेट प्राप्त गर्ने छ । गाउँपालिकाको आन्तरिक स्रोतबाट ५ करोड आय अनुमान गरेको छ । यि सबैको आँकलन गर्दा गाउँपालिकाले आगामी आर्थिक वर्ष २०७७/७८ का लागि ४८ करोडको बजेट अनुमान गरेको हो ।
बजेट निर्माणको तयारी अहिले गाउँपालिकामा तीव्रताका साथ चलिरहेको छ । गाउँपालिकामा आर्थिक समिति, सामाजिक समिति, पुर्वाधार समिति, विपद व्यवस्थापन समिति, सुशासन समिति र विधान समितिहरुले आ—आफ्नो विषयको छलफल चलाइरहेका छन् । जेठ २६ गतेबाट सुरु भएको विषयगत छलफल जेठ ३० गतेसम्म चल्ने गाउँपालिकाका प्रमुख प्रशासकीय अधिकृत रामकुमार पुडासैनीले जानकारी दिनुभयो । गाउँपालिकाले असार १ गतेदेखि ५ गतेसम्म बजेटको तयारीमा तीव्र रुपले लाग्ने बताएको छ । त्यसपछि कार्यपालिकाको बैठक लगायतका छलफलहरु गरेर असार १० गते गाउँपालिकाले आगामी आर्थिक वर्ष २०७७/७८ को नीति तथा कार्यक्रम प्रस्तुत गर्ने कार्ययोजना रहेको गाउँपालिकाले जानकारी दिएको छ ।
