हेटौंडाः बागमती प्रदेश सरकारको ४८ लाख रुपैयाँ अनुदान सहयोग रहेको हेटौंडा–१६ स्थित माछापोखरीको आज उद्घाटन गरिएको छ । बागमती प्रदेश सरकारका भूमि व्यवस्था, कृषि तथा सहकारी मन्त्री दावा दोर्जे लामाले माछापोखरीको उद्घाटन गर्नुभएको हो । मन्त्री लामाले माछाका भुरा पोखरीमा छाडेर माछापोखरीको उद्घाटन गर्नुभयो । एजी कृषि फार्म प्रालिले २ करोड रुपैयाँ लगानी गरेर सुरुवात गरेको फार्ममा प्रदेश सरकारले अनुदान दिएको हो ।
हेटौंडा–१६ का ३४ जना जग्गाधनीसँग कुल १० हेक्टर क्षेत्रफल जमिन लिजमा लिएर ९ वटा माछापोखरी बनाइएको एजी कृषि फार्मका सञ्चालक गणेश दाहालले जानकारी दिनुभयो । माछापोखरीको उद्घाटन गर्नुहुँदै मन्त्री लामाले प्रदेश सरकारले मकवानपुरको मनहरीसँगै चितवन र सिन्धुली जिल्लामा पनि व्यावासायिक माछापालनका लागि अनुदान वितरण गरेको जानकारी दिनुभयो । कृषिलाई भरपर्दो पेशाको रुपमा स्थापित गर्न प्रदेश सरकारको सहयोग निरन्तर रहने उल्ले गर्नुहुँदै मन्त्री लामाले कृषिमा आत्मनिर्भर हुन खेतबारी मात्रै नभएर आली पनि खाली छाड्न नहुने बताउनुभयो । एजी कृषि फार्मले माछासँगै लोकल कु्खुरा, हाँस, टर्की, खसी, बोका पालन पनि गर्ने जनाएको छ ।
