हेटौँडाः शिक्षक सेवा आयोगले प्राथमिक तहको शिक्षक नियुक्तिअन्तर्गत आज शनिबार दोस्रो पत्रको परीक्षा सञ्चालन गर्दैछ । बागमती प्रदेशको परीक्षा आज हेटौँडामा हुँदैछ । प्रथम पत्रमा उत्तीर्ण तीन हजार ९९ उम्मेदवार परीक्षामा सहभागी हुनेछन् । परीक्षा सञ्चालनका लागि शिक्षा विकास तथा समन्वय इकाईले आवश्यक तयारी गरेको छ ।
परीक्षामा सहभागी हुने दृष्टिविहिन उम्मेदवारले भने समस्या झेल्नुपरेको गुनासो गरेका छन् । बिहिबार शिक्षा विकास तथा समन्वय इकाईमा भेटिएका दृष्टिविहिन उम्मेदवारले परीक्षामा लेखन सहयोगी राख्न समस्या भएको बताएका छन् । लोकसेवा आयोगको परीक्षामा आयोगले नै लेखन सहयोगीको व्यवस्था गरिदिने भए पनि शिक्षक सेवामा भने त्यस्तो व्यवस्था नभएको भन्दै उनीहरुले दुख व्यक्त गरेका छन् ।
प्राथमिक तहको शिक्षकको परीक्षामा सहभागी हुन सुर्खेतदेखि हेटौँडा आइपुग्नु भएका तोरण अधिकारीले लेखन सहयोगी व्यवस्थापनमा समस्या भइरहेको बताउनुभयो । २०६६ सालदेखि राहत शिक्षकको रुपमा कार्यरत अधिकारी प्रमुख विषय नेपाली लिएर स्नात्तकोत्तर उपाधि हासिल गरिसक्नुभएको छ । दृष्टिविहिनका लागि तयारीमा पनि समस्या हुने अधिकारीको भनाइ छ । श्रव्य सामग्रीको अभावमा दृष्टिविहिनलाई समस्या हुने उहाँको भनाइ छ । “कुनै पुस्तक आधिकारिकरुपमा श्रव्य बनाएर प्राप्त हुने अवस्था छैन । अरु कसैले श्रव्य ढाँचामा तयार पार्दा कपिराइटको अधिकारविरुद्ध हुने खतरा रहन्छ”, अधिकारीले भन्नुभयो, “राज्यकै निकायले आधिकारिकरुपमा श्रव्य ढाँचामा तयार पारेर दिने व्यवस्था भए हामीलाई सहज हुन्थ्यो ।
परीक्षामा सहभागी हुन हेटौँडामा आइपुगेका दृष्टिविहिन उम्मेदवारहरुले अनलाइन कक्षाका कारण तयारीमा सहज भएको बताएका छन् । रौतहट जिल्लाका दिपेश कुमार बैठाले परीक्षामा दृष्टिविहिन उम्मेदवारलाई सबैभन्दा कठिन भएको दावी गर्नुहुन्छ । शारीरिकरुपमा सामान्य अपााङ्गता भएका व्यक्ति र पूर्णरुपमा दृष्टिविहिन व्यक्तिले समान अपाङ्गताको कोटामा प्रतिस्पर्धा गर्नुपर्ने व्यवस्था गलत भएको बैठाको भनाइ छ । दोस्रो पत्रको परीक्षाका लागि आएका दृष्टिविहिन उम्मेदवारहरु आफूहरु दृढ आत्मबलका साथ परीक्षामा सहभागी हुन हेटौँडा आएको बताएका छन् ।
