हेटौंडाः हेटौंडा अस्पतालबाट जेठ १५ गते काठमाडौं रेफर भएकी हेटौंडा–४ की एक महिलालाई कोरोना भाइरस संक्रमण पुष्टि भएको छ । बागमती प्रदेश सरकारको सामाजिक विकास मन्त्रालयले आज सोमबार साँझ जारी गरेको नियमित प्रेस वक्तव्यमा ६१ वर्षीया महिलामा कोरोना संक्रमण भएको जनाएको छ । मुटुमा समस्या भएर उपचारका लागि काठमाडौंस्थित नर्भिक अस्पतालमा उपचार गराइरहेको अवस्थामा ती महिलामा कोरोना पुष्टि भएको हो । कोरोना पुष्टि भएलगत्तै ती महिलालाई ललितपुरस्थित पाटन अस्पतालमा रेफर गरिएको छ ।
केही दिनअघि मुटुमा समस्या भएर उपचार गराउन हेटौंडा अस्पताल आएकी महिलालाई हेटौंडा अस्पतालले काठमाडौं रेफर गरेको मन्त्रालयले जनाएको छ । त्यसअघि स्वास्थ्य तथा जनसंख्या मन्त्रालयको नियमित पत्रकार सम्मेलनको क्रममा सोमबार साँझ ४ बजे नै ती महिलाको कोरोना संक्रमण भएको जानकारी गराइसकेको थियो । बागमती प्रदेशको सामाजिक विकास मन्त्रालयले ती महिलासँग सम्पर्कमा आएका व्यक्तिको पहिचान गर्ने कार्य भइरहेको पनि उल्लेख गरेको छ । हेटौंडा अस्पतालबाट रेफर गरिएको महिलामा कोरोना संक्रमण पुष्टि भएको भन्ने जानकारीपछि हेटौंडा अस्पतालका स्वास्थ्यकर्मीमा भने पुनः एकपटक त्रास बढेको छ ।
यता काठमाडौंको नर्भिक अस्पतालले भने कोरोना संक्रमित हेटौंडाकी महिलाको विषयमा विवादास्पद टिप्पणी गरेको छ । अनलाइनखबर डटकमका पत्रकारसँग नर्भिक अस्पतालका कार्यकारी निर्देशक राजेन्द्र सिंहले नर्भिक अस्पताल पुगेकै दिन ती महिलाको स्वाब संकलन गरी परीक्षणका लागि पठाएको दावी गरेको छ । साथै अस्पतालले ती महिलालाई कोरोना संक्रमितको उपचार गरिने आइसोलेसन कक्षमा राखेर उपचार गरेको पनि उल्लेख गरेको छ । कोरोना संक्रमित नै नभई या त्यस्ता लक्षण नै नभई ती महिलालाई किन नर्भिक अस्पतालले कोरोना आइसोलेसन वार्डमा राख्यो भन्ने विषय महत्वपूर्ण छ । यस्तै नर्भिकले आइसोलेसन वार्ड अस्पताल भन्दा बाहिर बनाएको र त्यसो हुँदा अस्पतालमा कुनै असर नपर्ने भनी अस्पतालको बचाउमा बढी ध्यान दिएको देखिन्छ ।
काठमाडौंबाट सञ्चालित अनलाइनखबर डटकममा नर्भिक अस्पतालको पक्षबाट यस्तो अभिव्यक्ति प्रस्तुत भएको छ ।
(नर्भिक अस्पतालका कार्यकारी निर्देशक राजेन्द्र सिंहले भने ‘हामीले आइसोलेसनमा नै राखेको बिरामी भएकाले कोही चिकित्सकहरुलाई खतरा भएन,आज उपचारको लागि पाटन अस्पताल पठाएका छौं ।’ आइसोलेसन कक्ष अस्पतालको बाहिरी भागमा बनाएको र आइसोलेसनमा खटिने विशेष टिम भएकाले अस्पतालको अरु सेवामा अप्ठेरो नपर्ने उनले जानकारी दिए ।)
