हेटौंडाः प्रकृति मानवकेन्द्रित जनअभियान नेपाल, बागमती प्रदेश समिति तथा हेटौंडा उपमहानगरपालिकाको संयुक्त आयोजनामा शुक्रबार हेटौंडामा अन्तरक्रिया कार्यक्रम भएको छ । हेटौंडा–४ स्थित पशुपति मन्दिरको सभाहलमा पर्यावरणीय संरक्षणमा मानव जातिको भूमिकासम्बन्धी अन्तरक्रिया भएको हो ।
मानवकेन्द्रित जनअभियानका पूर्वअध्यक्ष कृष्ण गौतमको सभाध्यक्षता तथा हेटौंडा उपमहानगरपालिका प्रमुख मीनाकुमारी लामाको प्रमुख आतिथ्यमा कार्यक्रम भएको हो । कार्यक्रमलाई सम्बोधन गर्नुहुँदै नगर प्रमुख लामाले अहिलेको अवस्थामा हामी सबैले एकअर्कालाई इज्जत दिएर अगाडि नबढेमा समाज कमजोर हुँदै जाने बताउनुभयो । नेपाली जनताहरुसँग धेरै ज्ञान, सीप तथा ऐतिहासिक कुराहरु भए पनि सही ढंगले उपयोग गर्न नसकेको उहाँले बताउनुभयो ।
वातावरणलाई मानिसहरुले संरक्षण गर्न नसकेमा प्रकृतिमा धेरै हानि–नोक्सानी हुनसक्ने भन्दै नगरप्रमुख लामाले चराचुरुङ्गी र जीवजन्तुहरुको संख्या घट्नसक्ने बताउनुभयो । जनताहरुले अन्तर्राष्ट्रिय कानुनको बन्धनमा रहेर पर्यावरणको संरक्षण गर्ने गरेको उहाँको भनाइ छ ।
मानिसले सवारी साधनहरुमा लाखौँ रुपैयाँ खर्च गरेको भए पनि खेतीबालीमा एक रुपैयाँ लगानी नगरेकाले पर्यावरणलाई असर गरेको उहाँले बताउनुभयो । सबै मानिसले घर, टोल, गाउँबाट विकासका कामहरु सुरु गरेर प्रकृतिसँग जोड्न सकेमा पर्यावरणको संरक्षण गर्न सकिने उहाँले दावी गर्नुभयो । प्राकृतिक कुराहरुलाई कसरी प्रयोग गर्न सकिन्छ भन्ने कुराको योजना मानिसले बनाउनुपर्ने उहाँको भनाइ छ । प्राकृतिक कुराहरुको संरक्षण गरेर कसरी नयाँ कुराहरु निर्माण सकिन्छ भन्ने कुराको अभियानमा लागि पर्नुपर्ने उहाँले बताउनुभयो । जबसम्म प्रकृति, तबसम्म मानव र जबसम्म मानव, तबसम्म प्रकृति भन्ने कुरालाई उहाँले जोड दिनुभयो ।
अहिले संसारमा मानव जातिको विकासका कारणले गर्दा विनास पनि भयानक तरिकाले सुरुवात भइरहेको मानवकेन्द्रित जनअभियानका पूर्वअध्यक्ष गौतमले बताउनुभयो । पर्र्यावरणको संरक्षण नभएका कारण सारा संसारको जीवजगतमाथि खतरा पैदा भइरहेको उहाँले बताउनुभयो । शुद्ध हावाको कमी, पानीको शुद्धतामा कमी, जैविक विविधतामाथि खतरा भइरहेको भन्दै गौतमले सम्पूर्ण जीवको बाँच्ने आधारमाथि चुनौतीहरु आइपरेको औँल्याउनुभयो । मानव जीवनमा आइपरेको चुनौतीहरुलाई न्यूनीकरण गर्नुपर्ने कुरामा लागि पर्नुपर्ने उहाँको भनाइ छ ।
हाम्रा सरकारभित्र कस्तो कमजोरी छ, राज्यभित्र कस्तो कमजोरी छ, सत्तापक्षमा कस्तो कमजोरी छ भन्ने कुरालाई मध्यनजर गरेर त्यो कुरालाई समेट्न लागि पर्नुपर्ने उहाँले बताउनुभयो । आफूभित्र भएको कमी कमजोरीलाई औँल्याउनुपर्ने उहाँले बताउनुभयो । विभिन्न कमजोरीलाई सम्बोधन गरेमा पृथ्वीको संरक्षण गर्नसक्ने उहाँले बताउनुभयो ।
यो कार्यक्रम अहिले ४७ वटा जिल्लामा चलिरहेको भन्दै गौतमले ७७ वटै जिल्लामा पुर्याउने लक्ष्य रहेको बताउनुभयो । कार्यक्रममा प्रकृति मानवकेन्द्रित अभियन्ता उत्तम कँडेललगायतको उपस्थिति थियो ।
