हेटौंडाः सरकारले सदनमा पेश गरेको विद्यालय शिक्षासम्बन्धी विधेयकको बिरोधमा नेपाल शिक्षक महासंघले आह्वान गरेको आन्दोलनको कार्यक्रमअनुसार आज बिहीबार मकवानपुरका सम्पूर्ण सामुदायिक विद्यालय बन्द हुने भएका छन् ।
माग सम्बोधन नभएसम्मका लागि बुधबारदेखि बिद्यालय बन्द गर्ने निर्णय भए पनि बुधबार सार्वजनिक विदासमेत भएका कारण पनि विद्यालय बन्द भएका थिए । तर, आज बिहीबारबाट नियमित पठनपाठन हुनुपर्ने विद्यालय नखुल्ने महासंघ मकवानपुरका अध्यक्ष जिधराज ढकालले बताउनुभयो । निजी विद्यालयहरुलाई समेत शिक्षकहरुको आन्दोलनमा एक्येबद्धता जनाउँदै विद्यालय बन्द गर्न अनुरोध गरिएको उहाँले बताउनुभयो ।
महासंघको आह्वानमा बुधबारदेखि काठमाडौं केन्द्रित आन्दोलन सुरु भएको छ । बुधबार माइतीघर मण्डलादेखि नयाँ बानेश्वरसम्म विरोधस्वरुप शिक्षकहरुले गरेको मार्चपासमा मकवानपुरबाट करिब १ हजार २ सय शिक्षकले सहभागिता जनाएको ढकालले जानकारी दिनुभयो । शिक्षकहरुले राखेका माग पूरा नभएसम्म विद्यालयको पठनपाठन नखुल्ने उहाँले स्पष्ट पार्नुभयो ।
सरकारले अहिले सदनमा पेश गरेको शिक्षा विधेयकमा १७ वटा बुँदा परिवर्तन गर्नुपर्ने महासंघको माग रहेको उहाँको भनाइ छ । अस्थायी प्रकृतिका शिक्षकहरुको स्थायित्व, शिक्षकको बढुवा, शिक्षकको सरुवालगायका माग राख्दै सरकारले केही बुँदा परिवर्तन गर्न आवश्यक रहेको उहाँले बताउनुभयो ।
प्रतिनिधिसभामा दर्ता भएको विधेयकमा उल्लेख भएबमोजिम स्थानीय तहलाई सम्पूर्ण अधिकार दिँदा राजनीतिक आस्था र पक्षधरताको आधारमा काम हुने जोखिम रहेको बताइएको छ । शिक्षा क्षेत्र शिक्षकसँग मात्र नभई विद्यार्थीको भविश्यसँग जोडिएको हुनाले आभिभावकलाई समेत आन्दोलनमा सहाभागी हुन ढकालले अनुरोध गर्नुभयो । सरकारले शिक्षकको मागलाई छिट्टै नै सम्बोधन गरेमा आफूहरु विद्यालय बन्द गर्ने पक्षमा नरहेको उहाँले स्पष्ट पार्नुभयो ।
