हेटौंडाः हेटौंडा उपमहानगरपालिकाको १८ नम्बर वडाले स्नातक तहमा अध्ययनरत विद्यार्थीका लागि बस सेवा सुरु गरेको छ । वडाले आइतबारदेखि बस सेवा सञ्चालनमा ल्याएको वडा अध्यक्ष अनिलकुमार बानियाँले जानकारी दिनुभयो । स्नातक तहमा अध्ययनरत वडाका विद्यार्थीको सुविधाका लागि वडाले नै खर्च बेहोर्ने गरी बस सेवा सुरु गरेको हो । वडाले प्रतिविद्यार्थी दैनिक ५० रुपैयाँको दरले यातायात खर्च व्यहोर्ने बताइएको छ ।
विश्वविद्यालय तहको शिक्षा आर्जन गर्ने विद्यार्थी १८ किलोमिटर टाढा जानुपरेकाले वडाले यो उपाय निकालेको हो । आर्थिक अवस्था कमजोर भएका कारण विद्यार्थी पढ्न जान नसकेको तथा पढ्न गएका विद्यार्थी नबिग्रिउन् भनेर वडाले बस सेवा सञ्चालनमा ल्याएको वडा अध्यक्ष बानियाँले बताउनुभयो ।
वडाले बस प्रयोग गर्ने विद्यार्थी ८० जना हुने अनुमान गरेको भए पनि १ सय २६ जना विद्यार्थीले यातायात सुविधा लिने अवस्था देखिएको बताइएको छ । विद्यार्थीका लागि वडाले दुई वटा बस भाडामा लिई सञ्चालन गरेको छ । बसले बालबालिकालाई क्याम्पस समयमा पु¥याउनुपर्ने गरी वडा कार्यालय र बस सञ्चालकबीच सम्झौता गरिएको उहाँले बताउनुभयो । बसले दैनिक चार “सिप्mट”मा विद्यार्थी ल्याउने तथा पु¥याउनुपर्ने वडा अध्यक्ष बानियाँले बताउनुभयो ।
वडाले बसमा दोहोरो जाँच, दर्ता तथा क्याम्पसमा उपस्थितिसमेत हेर्ने भएको छ । वडा अध्यक्ष बानियाँका अनुसार बस सेवा सञ्चालन भएपछि छोरी मान्छेलाई डर नहुने, रातिको समयमा बस नपाउने समस्या नहुने बताउनुभयो । बस सेवाले विद्यार्थीलाई समयको पालना गर्न सहयोग पुग्नुका साथै पढाइमा सकारात्मक सोचको विकास हुने विश्वास लिएको उहाँको भनाइ छ ।
वडाले बस सेवा प्रयोग गर्ने विद्यार्थीका लागि कार्ड बनाएको छ । कार्ड भएका विद्यार्थी नराम्रो बाटोतिर लागे वा नराम्रो ठाउँमा गएको पाइएमा कडा कारबाही गरिने उहाँले जानकारी दिनुभयो । बस सेवा सञ्चालनप्रति अभिभावकको सकारात्मक जवाफ आएको वडा अध्यक्ष बानियाँले बताउनुभयो ।
