हेटौँडाः खाद्य प्रविधि तथा गुण नियन्त्रण कार्यालयले आइतबार अनुगमनका क्रममा अत्यधिक फोहर र असुरक्षित भण्डारण एवम् बिक्री वितरणको अवस्था देखेर सिल गरिएको हेटौँडा–१०, मेनरोडस्थित जय शम्भु मिष्ठान्न भण्डार सोमबार खुला रहेको छ ।
स्थानीय प्रशासन, स्थानीय सरकार र सुरक्षा निकायको समेत सहभागितामा खाद्य प्रविधि तथा गुण नियन्त्रण कार्यालय हेटौँडाको संयोजनमा भएको अनुगमनका क्रममा कमिकमजोरी भेटिएपछि गरिएको सिललाई बेवास्ता गर्दै व्यवसायीले पसल सुचारु राखेका छन् ।
यता हेटौँडा–४, कान्तिराजपथस्थित चन्दन स्वीट्स एण्ड बेकरीले पनि सरकारी सूचना च्यातेको पाइएको छ । सोमबार दिउँसो अनुगमनको क्रममा चन्दन स्वीट्स एण्ड बेकरीले फोहर व्यवस्थापनमा ध्यान नदिउको, फोहर पानी बग्ने पाइप फुटेर दुर्गन्धित भएको लगायतको वस्तुस्थितबारे उल्लेख गरिएको सूचना टाँस गरिएको थियो ।
अनुगमनका क्रममा पाइएको कैफियतसम्बन्धी सूचना ३ दिनसम्म सुरक्षित राख्न र उपभोक्ताले अध्ययन गर्न पाओस् भन्ने उद्देश्यले टाँसिएको थियो । तर, अनुगमन टोली गएको केही मिनेटमै सूचना च्यातिएको छ । यस विषयमा खाद्य प्रविधि तथा गुण नियन्त्रण कार्यालय हेटौँडाका कार्यालय प्रमुख क्षीतिज श्रेष्ठलाई जानकारी गराउँदा अनुगमन टोलीका संयोजकमार्फत बुझ्ने बताउनुभएको छ ।
