मकवानपुर जिल्लाको स्वास्थ्य सेवाको क्षेत्रमा विगतमा भन्दा निक्कै सुधार भएको छ । जिल्ला अस्पतालको रुपमा रहेको हेटौँडा अस्पताललाई बागमती प्रदेश सरकारले मदन भण्डारी स्वास्थ्य विज्ञान प्रतिष्ठानको रुपमा विकास गर्दै लगेको छ भने निजी क्षेत्रका स्वास्थ्य संस्थाले पनि आफ्नो क्षमता विकास गर्दै गएको छ । यसैबीच सञ्चालनको नवौं वर्षमा प्रवेश गर्दै गर्दा हेटौँडा–११, थानाभर्याङस्थित चुरेहिल हस्पिटलले चितवन जिल्लास्थित चितवन मेडिकल कलेजसँग मर्ज भएर क्षमता विस्तारको योजना बनाउँदैछ । मेडिकल कलेजसँग मर्ज भएपछि चुरेहिल अस्पतालबाट अझ स्तरीय स्वास्थ्य सेवा प्राप्त गर्ने अपेक्षासहित मकवानपुरवासीले सुखद् समाचारको रुपमा लिएका छन् । चुरेहिल हस्पिटल र चितवन मेडिकल कलेजबीच मर्जको विषयमा चुरेहिल हस्पिटलका प्रबन्धक नारायणलाल श्रेष्ठसँग समृद्ध समाज दैनिकका सम्पादक सुरेश श्रेष्ठले गर्नुभएको कुराकानीः
समाजः चुरेहिल हस्पिटल र चितवन मेडिकल कलेज (सिएमसी) सँग मर्ज हुने अवस्था कसरी आयो ?
श्रेष्ठः हाम्रो चुरेहिल हस्पिटलको व्यवस्थापन पक्षमा सुधारको आवश्यकता महसुस ग¥यौं । हस्पिटललाई कसरी राम्रो बनाउन सकिन्छ भनेर हाम्रो भन्दा ठूला केही अस्पतालहरुसँग छलफल ग¥यौं । अन्ततः चितवन मेडिकल कलेज र चुरेहिल हस्पिटल जोडिन पुग्यो । हामीले सुविधा सम्पन्न अस्पतालको कल्पना गरेका छौं । हामी हेटौंडाकै राम्रो सुविधासम्पन्न र व्यवस्थित अस्पताल बनाउने योजनामा छौं ।
समाजः चुरेहिललाई नै नयाँ सुविधासम्पन्न अस्पताल बनाएर सञ्चालन गर्न खोज्नुभएको छ ?
श्रेष्ठः एउटा तहको व्यवस्थापनमा चुरेहिल हस्पिटल छँदैछ । चुरेहिलको नाम के रहने र सिएमसी कसरी अटाउने भन्ने विषयमा हामी निष्कर्षमा पुगेका छैनौं । हामी मर्ज गर्ने तयारीमा छौं ।
समाजः यो मर्ज तपाईहरुको आवश्यकताले मात्रै हुन लागेको हो कि सिएमसी पनि हेटौँडामा सेवा विस्तार गर्न इच्छुक थियो ?
श्रेष्ठः यो दुइटै कुरा मिल्न खोज्छ । हाम्रो कुराले पनि सम्भव थिएन, उहाँहरुको कुराले मात्रै पनि सम्भव थिएन । तर हामी मिलेर सँगै जानका लागि अन्तिम चरण पुगिसकेका छौँ । आउँदो भदै ७ गते पत्रकार सम्मेलन गर्दैछौँ । सम्पूर्ण पत्रकार साथीहरुलाई बोलाएर त्यहाँ कस्ता–कस्ता सुविधाहरु दिन्छन्, अब हस्पिटल कसरी अघि बढ्छ । हस्पिटलको सम्पूर्ण कार्यलाई व्यवस्थित बनाएर अगाडि बढ्ने योजना छ ।
समाजः यो ८/९ वर्ष तपाईहरुले सेवा प्रदान गर्नुभयो, अब हामी मकवानपुरकोे चुरेहिल अस्पताललाई कुन स्तरको अस्पतालमा सञ्चालन गर्नुपर्छ भन्ने तपाईहरुको बुझाई छ ?
श्रेष्ठः उद्देश्य त ठूलो लिएका थियौँ । तर, विभिन्न कारणले गर्दा हामी त्यो स्तरमा पुग्न सकेनौँ । सिएमसीसँग डाक्टरको कुनै कमि छैन । त्यो हिसाबले अबको दिनमा मकवानपुरमा डाक्टरहरुको कमी भएको कारणले गर्दा अस्पतालहरु नचल्ने अवस्था हुन्न । अब डाक्टरहरुको कमी हुने छैन, त्यसैले अस्पतालहरु चल्नेमा हामी ढुक्कले छौँ ।
समाजः मकवानपुरको स्वास्थ्य सेवाको क्षेत्र एउटा हिसाबले विकसित हुँदैछ अथवा परिपक्वा हुँदैछ भनी बुझाउने गरी सम्झौता हुँदै हो ?
श्रेष्ठः आउने दिनमा चुरेहिल र सिएमसी मर्ज हुँदै गर्दा हिजोकै संरचनामा चल्ने हो भने किन आवश्यक रह्यो त ? त्यसैले यसलाई स्तरोन्नति गर्नुपर्छ । त्यसलाई विभिन्न डाक्टरहरुको सेवा, सुविधा दिनुपर्छ । यसैगरी न्युरो, मेडिसिन, अर्थाेपेडिक र धेरै नै संकायहरु हाम्रो मकवानपुरमा जारी भइसकेको अवस्था छैन ।
समाजः चुरेहिल अस्पतालमा वेडको हिसाबले र अरु थप कार्यक्रमहरु के–के रहने छ ?
श्रेष्ठः अहिले हामी २५ वेडमा छौँ । अब हामी सय वेडमा ल्याउन समय लाग्छ । एउटा अस्पतालले २५ वेड लिएको ५/७ वर्ष पुगेपछि वेड थप्न पाइने रहेछ । अस्पताललाई अपग्रेड गर्न हामीसँग पुग्दो संरचना छ । त्यसैले हामी चाँडै सय वेडमा जान्छौँ । सय वेडमा गइसकेपछि नर्सको आवश्यक हुन्छ । हामी नर्स पढाउने सहमति नै छौँ ।
समाजः तपाई चुरेहिल अस्पतालको प्रबन्धक रुपमा रहिरहनुहुँदा मकवानपुरका सेवाग्राहीलाई के भन्नु हुन्छ ?
श्रेष्ठः अब मकवानपुरबासी सामान्य चोटपटक, टाउकोमा चोट लाग्दा उपचारका लागि टाढा जानुपर्ने बाध्यताको आवश्य अन्त्य हुनेछ । सिएमसीले दिने सेवासुविधाहरु यहीँबाट दिने भएको छ ।
