हेटौँडाः लागुऔषधसहित बीरगन्ज महानगरपालिका–१५ की ५० वर्षीया कलमा खातुनलाई मकवानपुर प्रहरीले पक्राउ गरेको छ । सोमबार दिउँसो २ बजेर १५ मिनेटको समयमा पूर्वपश्चिम राजमार्गअन्तर्गत हेटौँडा–१५, पिपलचौतारामा प्रहरीले बीरगंजबाट हेटौँडा आउँदै गरेको ना २८ प ७७२ नम्बरको मोटरसाइकललाई रोक्ने प्रयास गरेको थियो ।
प्रहरीले सुरक्षाजाँच गर्न खोज्दा फर्किएर बीरगन्जतर्फ नै भागेको मोटरसाइकललाई पूर्वपश्चिम राजमार्गअन्तर्गत नै मकवानपुर र बारा जिल्लाको सिमाना चुरियामाई मन्दिरमा नियन्त्रणमा लिन सफल भएको थियो । मोटरसाइकल र मोटरसाइकलमा सवार कलमालाई पक्राउ गरे पनि प्रहरीले मोटरसाइकल चालकलाई भने नियन्त्रणमा लिन सकेन । कलमाको साथबाट प्रहरीले १०० मिलिलिटरको वानरेक्स २३० बोतल बरामद भएको जनाएको छ । फरार मोटरसाइकलकको खोजी कार्यका साथै घटनाको अनुसन्धान जारी राखेको प्रहरीले उल्लेख गरेको छ ।
