हेटौंडाः मकवानपुरको बागमती गाउँपालिकाको व्यापार व्यवसायी संघको अध्यक्षमा चित्र बहादुर (उमेश) पुलामी सर्वसम्मत चयन हुनुभएको छ । पालिकाका व्यवसायीहरुको मंगलबार भएको भेलाबाट पुलामी अध्यक्षमा चयन हुनुभएको हो ।
पुलामीको अध्यक्षतामा १३ सदस्यीय व्यवसायी संघ गठन गरिएको छ । संघको उपाध्यक्षमा गोकुल खड्का, सचिवमा प्रकाश रेग्मी, सह–सचिवमा सोनामसिंह घिसिङ र कोषाध्यक्षमा प्रमोद साह चयन हुनुभएको छ । केही सदस्यहरु पछि थप गरिने अध्यक्ष पुलामीले बताउनुभयो । कपडा व्यवसायी पुलामीले आफ्नो कार्यकालमा पालिकाभित्रका व्यवसायीहरुको समस्याहरुलाई समाधान गर्न आवश्यक पहल गरिने बताउनुभयो ।
संघको नवनिर्वाचित समितिको कार्यकाल ५ वर्षको रहनेछ । पालिकाका जेष्ठ व्यवसायी धनपति तिमल्सिनाको सभाध्यक्षतामा भएको भेलामा पालिकाभित्रका व्यवसायीहरुको उपस्थिति रहेको थियो ।
