हेटौंडाः आँचल साहित्य कला पुञ्ज मकवानपुरको आयोजनामा शुक्रबारदेखि वृहत् साहित्यिक तथा सांस्कृतिक कार्यक्रम–२०८० सुरु भएको छ । पुञ्जकी अध्यक्ष भावना सापकोटाको सभाध्यक्ष तथा हेटौंडा उपमहानगरपालिकाका प्रमुख मीनाकुमारी लामाको प्रमुख आतिथ्यमा दुई दिने कार्यक्रम सुरु भएको हो ।
उपमहानगरप प्रमुख लामाले कला, संस्कृति र परम्पराको जगेर्ना गर्न कार्यक्रमले सहयोग पुग्ने बताउनुभयो । पहिलो दिन आधारभूत तहस्तरीय नृत्य प्रतियोगिता भएको छ । प्रतियोगितामा हेटौंडा–५, पिप्लेमा रहेको बालज्योति माध्यमिक विद्यालय प्रथम, हेटौंडा–४ मा रहेको ब्रह्मदिक एकेडेमी द्वितीय, हेटौंडा–५ मा रहेको जीएस निकेतन तृतीय र सिद्धार्थ शिशु सदन सान्त्वना भएका छन् ।
प्रतियोगितामा १९ विद्यालयका विद्यार्थी समूहले नृत्य प्रस्तुत गरेका थिए । आधारभूत तहस्तरीय नृत्य प्रतियोगितामा पर्वत राई, पेमा लोप्चन र प्रलय चौलागाईले निर्णायकको भूमिका निर्वाह गर्नुभयो ।
कार्यक्रममा लैङ्गिक अधिकार हाम्रो सरोकार शीर्षकमा बहस गरिएको छ । रजनी पौडेलले सहजीकरण गर्नुभएको कार्यक्रममा अधिवक्ता मदन दाहाल, सामाजिक अभियन्ता कमला सुवेदी र बागमती प्रदेशको सामाजिक विकास मन्त्रालयका चन्दा व्यञ्जनकारले बहसकर्ताको भूमिका निभाउनुभयो । बहस कार्यक्रममा मुना अर्यालको अभिभावकत्व रहेको थियोे ।
सुर संगमबारे नीरा शर्माले सहजीकरण गर्नुभयो भने प्रमेन्द्र महर्जनले अभिभावकत्व निभाउनुभयो । यसैगरी, अन्तिम दिन शनिबार लैङ्गिक तथा यौनिक अल्पसंख्यकको आवाज शीर्षकमा रचना वाचन, साहित्यमा लैङगिक सवाल, हास्यव्यङ्ग्य प्रस्तुति र कविता, गजल, मुक्तक, सूत्रकथाबारे सहजीकरण गरिनेछ ।
