हेटौंडाः हेटौंडा—९ स्थित त्रिवेणी आधारभूत विद्यालयको ३४ औं वार्षिकोत्सव एवम् अभिभावक भेला सोमबार सम्पन्न भएको छ । हेटौंडा—९ का वडाध्यक्ष सुकराम केसीको प्रमुख आतिथ्य तथा विद्यालय व्यवस्थापन समितिका अध्यक्ष धर्मराज धिमालको सभाध्यक्षतामा भेला भएको हो ।
भेलालाई सम्बोधन गर्दै वडा अध्यक्ष केसीले विद्यालयलाई सहयोग गर्दै आइरहेको र त्यसलाई निरन्तरता दिइने प्रतिबद्वता जनाउनुभयो । भेलामा विद्यालय व्यवस्थापन समितिका पूर्वअध्यक्ष, पूर्वप्रधानाध्यापक र विद्यालयलाई विभिन्न क्षेत्रबाट योगदान गर्ने व्यक्तिलाई सम्मान गरिएको छ । पूर्वअध्यक्षहरु ईश्वरी न्यौपाने, स्वर्गीय पदमबहादुर थापा, अमृता दुलाल, धु्रव लामिछाने, शिवराज आचार्य, निवर्तमान अध्यक्ष ताराप्रसाद लामिछानेलाई सम्मानित गरिएको छ । यस्तै, पूर्वप्रधानाध्यापक लोकमणि कोइराला, अन्नपूर्ण डंगोल, प्रदीप झा, रुद्रा घिमिरेलाई सम्मानित गरिएको छ ।
विगत ४ वर्षदेखि २ जना विद्यार्थीको अभिभावकत्व ग्रहण गर्दै आइरहनुभएका र विद्यालयमा अध्ययनरत् विद्यार्थीलाई स्टेशनरी सामग्री उपलब्ध गराउँदै आउनुभएका समाजसेवी विकेशलाल श्रेष्ठलाई सम्मानित गरिएको छ । यसैगरी सोही दिन टिभी सहयोग गर्नुभएका अशोक सिंहलाई पनि सहयोग गरिएको छ । विगत ४ वर्षदेखि कोचिङ तथा अतिरिक्त कक्षाबाट उठेका रकम विद्यालयलाई सहयोग गर्दै आइरहनुभएका चन्द्रमाया उप्रेतीलाई सम्मानित गरिएको छ ।
कक्षामा उत्कृष्ट हुने विद्यार्थी, अनुशासन, जेहेन्दार, नियमित विद्यालय आउने विद्यार्थीलाई पुरस्कृत गरिएको छ । यस शैक्षिक सत्रमा नयाँ भर्ना हुन आएका ४२ जना विद्यार्थीलाई पोशाक वितरण गरिएको विद्यालयका प्रधानाध्यापक सुशीला पौडेलले जानकारी दिनुभयो । विद्यालयमा करिब २ सय जना विद्यार्थी अध्ययनरत् छन् ।
