हेटौंडाः बागमती प्रदेश सरकारको सामाजिक विकास मन्त्रालयले आउँदो असार १० गतेभित्र खोजमूलक समाचार उपलब्ध गराउन महिला पत्रकारहरुलाई आग्रह गरेको छ । महिला, बालबालिका, अपाङ्गता भएका व्यक्ति तथा ज्येष्ठ नागरिक र लैंगिक तथा यौनिक अल्पसंख्यकहरुको खोजमूलक समाचार संकलन, प्रकाशन/प्रसारण गरी सामाजिक विकास मन्त्रालयमा कागजातसहित उपलब्ध गराउन आग्रह गरिएको हो ।
सामाजिक विकास क्षेत्रका कार्यक्रमको खोजमूलक पत्रकारितालाई जोड दिनुपर्ने बताइएको छ । उक्त विषयमा कानुनबमोजिम समाचार संकलन र प्रकाशनका लागि महिला पत्रकार र प्रदेश सरकारबीच सम्झौता भएको छ । महिला पत्रकारले एउटा खोजमूलक समाचार प्रकाशन गरेबापत ६ हजार रुपैयाँ प्राप्त गर्नेछन् । अधिकतम ३ वटा खोजमूलक समाचारबापतको रकम भुक्तानी हुने जनाइएको छ ।
खोजमूलक समाचार तयार गर्दा सामाजिक विकास मन्त्रालयबाट सम्पादन भएका कार्यक्रमले पारेका प्रभावहरुको बारेमा हुनुपर्ने सामाजिक विकास मन्त्रालय उच्च शिक्षा प्रविधि अनुसन्धानका उपसचिव गोपालप्रसाद कँडेलले जानकारी दिनुभयो । मन्त्रालयमा पेश भएका फिचर समाचारहरु आवश्यकताअनुसार छपाई वितरण गर्ने व्यवस्था मन्त्रालयले मिलाउनेछ ।
फिचर समाचारको साथमा मन्त्रालयलाई छुट्टै सुझाव पेश गर्न सकिनेछ । प्राप्त सुझाव मन्त्रालयको आन्तरिक प्रयोजनका लागि प्रयोग गरिनेछ । बागमती प्रदेशका सामाजिक क्षेत्रका महिला, बालबालिका, अपाङ्गता भएका व्यक्ति, ज्येष्ठ नागरिक तथा यौनिक अल्पसंख्यक र पाठक वर्गलाई लाभान्वित फिचर समाचार हुनुपर्ने बताइएको छ ।
बागमती प्रदेशका नुवाकोट, मकवानपुर, सिन्धुपाल्चोक, दोलखा, काठमाडौं, चितवन, सिन्धुली, रामेछाप, भक्तपुर, धादिङ, ललितपुर, रसुवा र काभ्रेपलाञ्चोक जिल्लाका २/२ जना पत्रकारलाई उक्त विषयमा अनुशिक्षण दिँदै यस्तो बताइएको छ । महिला पत्रकारहरुको क्षमता विकास, पत्रकारितामा तालिमको आकर्षण, व्यावसायिक पत्रकारिताको विकासमा टेवा र सामाजिक विकास क्षेत्रका सवालहरु उठानमा सहयोग पुग्ने बताइएको छ ।
यसैगरी सञ्चारिका समूह बागमती प्रदेशकी संयोजक सरिता दाहालले महिला पत्रकारहरुको पेशागत, व्यक्तिगत र अनलाइन सुरक्षाबारे सहजीकरण गर्नुभयो । नेतृत्व र अवसरबारे सहजीकरण गर्नुहुँदै महिलालाई सुरक्षाको सवालमा पुरुषलाई भन्दा बढी चुनौती रहेको उहाँले जानकारी दिनुभयो ।
नेपालमा पत्रकार महिलाको उपस्थिति वि.स. २००८ बाट भएको देखिन्छ । नेपाल पत्रकार महासंघका अनुसार देशभर १३ हजार २ सयको हाराहारीमा महिला पत्रकार छन् । पत्रकार अखण्ड भण्डारीले समाचारको परिचय, संकलन, लेखन, शब्दको छनौटबारे सहजीकरण गर्नुभयो ।
सामाजिक विकास मन्त्रालयका सचिव रामकृष्ण पुडासैनीको सभाध्यक्षमा कार्यक्रम भएको हो । सामाजिक विकास मन्त्री कुमारी मोक्तानको प्रमुख आतिथ्यमा एक दिवसीय अनुशिक्षण कार्यक्रम भएको हो । महिला पत्रकारहरुले प्रदेश सरकारसँग थप सहयोगको अपेक्षा गरे सहयोग गर्ने प्रतिबद्धता मन्त्री मोक्तानले व्यक्त गर्नुभयो । मन्त्रालयको आयोजना तथा नेपाल पत्रकार महासंघ बागमती प्रदेशको समन्वयमा कार्यक्रम भएको हो ।
