हेटौँडाः नेपाल विद्युत प्राधिकरण हेटौँडा वितरण केन्द्रले कालोसूचिमा रहेका ५ सय ४२ ग्राहक विवरण सार्वजनिक गर्दै वक्यौता भुक्तानी गर्न भनेको छ । आइतबार कालोसूचिमा परेका ग्राहकको तीन पुस्ते विवरण सार्वजनिक गर्दै वितरण केन्द्रले असार मसान्तसम्म वक्यौता भुक्तानी गरे १० प्रतिशत छुट दिने जनाएको छ ।
नेपाल विद्युत प्राधिकरणले लामो समयसम्म महसुल भुक्तानी नगर्ने ग्राहकको लाइन काटेको ६ माहिनासम्म पनि महसुल भुक्तानी नगरे स्वतः कालोसूचिमा पर्ने व्यवस्था छ । हेटौँडा वितरण केन्द्रले ग्राहस्थ ४६४, व्यापारिक ३, औद्योगिकमा ६७, सिँचाई १, गैरव्यापारिकमा २, यातायात ३, खानेपानी २ गरी कुल ५४२ ग्राहक कालोसूचिमा परेको हेटौंडा वितरण केन्द्रका हरि खड्काले जानकारी दिनुभयो । कालोसूचिमा रहेका ग्राहकबाट हेटौँडा वितरण केन्द्रले ९२ लाख ४७ हजार ८ सय ८८ रुपैयाँ १२ पैसा असुल गर्नुपर्नेछ ।
प्राधिकरण केन्द्रकै निर्देशनमा देशव्यापीरुपमै वक्यौता असुली गर्ने उद्देश्यसहित कालोसूचि तयार पारेर सार्वजनिक गर्ने कार्य भएको हो । हेटौँडा वितरण केन्द्रले इन्जिनियर ललितनारायण चौधरीको संयोजकत्वमा समिति नै गठन गरेको छ । वक्यौता भुक्तानी नगर्ने ग्राहकहरुको तीन पुस्ते विवरणसहित जिल्ला प्रशासन कार्यालय, नापी, मालपोत, स्थानीय पालिका र वडा कार्यालयहरूमा पठाउने तयारी भइरहेको पनि प्राधिरकणले जनाएको छ । वक्यौता भुक्तानी नगरे सरकारी सेवा, सुविधाबाट बञ्चित गराउने गरी कारवाही अगाडि बढाउने पनि प्राधिकरणले स्पष्ट पारेको छ ।
