हेटौंडाः विश्वविद्यालय अनुदान आयोगले हेटौंडा–४ स्थित हेटौंडा क्याम्पसको शैक्षिक गुणस्तर तथा प्रमाणीकरण (क्युएए) प्रक्रियाको अन्तिम चरणका कार्य गरिरहेको छ । क्याम्पसको संस्थागत, शैक्षिक, भौतिक विकाससँगै क्याम्पसको सामाजिक योगदानको पाटोमा पनि मूल्यांकन गरी क्याम्पसको सर्वपक्षीय सुधारका लागि आवश्यक सहयोग र सहजीकरण गर्ने कार्य आयोगले गर्ने गर्दछ ।
शनिबार एक कार्यक्रमका बीच हेटौंडा क्याम्पसले आयोगका पदाधिकारीलाई क्याम्पसको नीति, शिक्षण सिकाई र मूल्यांकन, अनुसन्धान, परामर्श र विस्तार, पूर्वाधार र अतिरिक्त क्रियाकलापका लागि संरचना जस्ता विषयमा जानकारी गराएको छ । यस्तै विद्यार्थीका लागि समर्र्थन र मार्गदर्शन प्रदान, सुचना प्रणालीमा र सार्वजनिक सुचना प्रणालीमा विद्यार्थीलाई समावेश गराइएको हुनुपर्ने आयोगले उल्लेख गरेको छ ।
पूर्वपरीक्षण भ्रमण टोलीका संयोजक तथा प्रा.डा. सुनिति हाडा श्रेष्ठले र हेटौंडा क्याम्पस संचालक समितिका अध्यक्ष अनन्तराम पराजुलीबीच शैक्षिक गुणस्तर मान्यता प्राप्तिका लागि तोकिएका मापदण्डमा सम्झौता समेत भएको छ । वैशाख १९ गतेदेखि उक्त टोलीले क्याम्पस, विद्यार्थी, कर्मचारी, प्राध्यापक र अभिभावकबीच विविध विषयमा छलफल, अध्ययन र अनुसन्धान गरेको छ ।
क्याम्पसले पहिलाको तुलनामा केही मात्रामा सुधार गरेको प्रा.डा. श्रेष्ठको भनाइ छ । शैक्षिक गुणस्तर मान्यता प्राप्तिका लागि न्यूनतम मापदण्डहरु पूरा भएको हुनुपर्ने उहाँको भनाइ छ । तर अझै क्याम्पसले बीचैमा पढाइ छाड्ने विद्यार्थीको संख्यामा न्यूनीकरण गर्न नसकेको र नियमित क्याम्पस आउने वातावरण निर्माण गर्न नसकेको अनुगमन टोलीको ठहर छ । सेमिनार, गोष्ठी, क्याम्पस बस, फर्निचरको मर्मत, विभागीय अध्ययन अनुसन्धानमा कम्प्युटर तथा कक्षाकोठाको अभाव, ई–लाइब्रेरीको व्यवस्था, छात्राबासको व्यवस्था नगरिएको श्रेष्ठले बताउनुभयो । स्थानीय तहको प्रचुर मात्रमा सहयोग रहेकाले कसरी अघि बढाउने भन्ने कुरामा क्याम्पसको ध्यानाकर्षण हुन जरुरी रहेको उहाँले बताउनुभयो । श्रेष्ठका अनुसार गत वर्षको तुलनामा पिउने पानीमा भने सुधार भएको छ ।
उक्त परीक्षण अन्तिम रहेकाले छिट्टै शैक्षिक गुणस्तर मान्यता प्राप्तिका लागि मापदण्ड पूरा गर्न प्रा.डा. श्रेष्ठले आग्रह गर्नुभयो । विज्ञ प्रा.डा. विनोद लुइँटेल, विज्ञ प्रा.डा. चिरञ्जीवी खनाल र विश्वविद्यालय अनुदान आयोगका सचिवालय सदस्य सन्विदा पाठकले पनि क्याम्पसले सुधार गर्नुपर्ने विषयमा आफ्ना धारणा राख्नुभएको थियो ।
