हेटौंडाः आज बैशाख २२ गते पनि मकवानपुर जिल्लाको सदरमुकाम बागमती प्रदेशको राजधानी हेटौंडास्थित थोक तरकारी बजारमा तरकारीको थोक बजार मूल्यमा सामान्य हेरफेर भएको छ । काउली, बन्दा, भ्यान्टा, मुला, काँक्रो, हरियो खुर्सानी, रायोगको सागको मूल्यमा कुनै हेरफेर भएको छैन भने गोलभेँडा हिजो भन्दा प्रतिकेजी ५ रुपैयाँ सस्तो भएर प्रतिकेजी २० रुपैयाँमा कारोबार भएको छ । भिन्डी केही महंगो भएको छ । हिजो ५५ रुपैयाँ प्रतिकेजीमा कारोबार भएको भिन्डी आज प्रतिकेजी ७० रुपैयाँमा कारोबार भइरहेको छ ।
तरकारीको थोकमूल्यको तुलना उपभोक्ताले बढी मूल्य तिर्नु परेको गुनासो आइरहेको छ । थोक व्यवसायीका अनुसार तरकारीको प्रकृति हेरेर थोक मूल्यमा प्रतिकेजी १० देखि १५ रुपैयाँ थप गरेर खुद्रा मूल्य कायम गर्दा व्यवसायीले उचित लाभ पाउने र उपभोक्ताले पनि वास्तविक मूल्यमा तरकारी खरिद गर्न पाउने बताउँछन् । थोक तरकारी व्यवसायी बद्रि घिमिरेका अनुसार काउली, बन्दा जस्ता केही तरकारीमा प्रतिकेजी १५ रुपैयाँ र अन्य तरकारीमा १० रुपैयाँ थप गरेर उपभोक्ता मूल्य कायम गर्न सकिने बताउनुहुन्छ ।
