हेटौंडाः पाँचौ संस्करणको स्थानीय तह शहीद स्मृति अन्तर्राष्ट्रिय मकवानपुर गोल्डकप फुटबल प्रतियोगिता सुरु भएको छ । हेटौंडा उपमहानगरपालिकाकी प्रमुख मिना कुमारी लामाले शनिबार प्रतियोगिताको उद्घाटन गर्नुभयो ।
हेटौंडा–५, पिप्लेस्थित क्याम्पा रंगशालामा सुरु प्रतियोगिताको उद्घाटन खेलमा घरेलु टोली मकवानपुर–११ ले विजयी सुरुवात गरेको छ । सिमराको नवजागृति युवा क्लबलाई २–० गोलले हराउँदै मकवानपुरले विजयी सुरुवात गरेको हो । मकवानपुरका लागि प्रितम स्याङ्बो र फागुराम चौधरीले १–१ गोल गरे । दुवै गोल पहिलो हाफमा भएको हो । मकवानपुरले अब क्वाटरफाइनलमा फ्रेन्ड्स क्लबसँग खेल्नेछ । प्रतियोगिता अन्तर्गत आज आइतबार ए डिभिजन क्लब सातदोबाटो क्लब र मनाङमस्र्याङ्दीबीच प्रतिस्पर्धा हुनेछ । प्रतियोगिताको फाइनल खेल फागुन १० गते हुनेछ ।
प्रतियोगितामा १२ वटा टिम सहभागी छन् । समूह ए मा नेपाल एपीएफ, हिमालयन शेर्पा क्लब, बीरगन्ज युनाइटेड, एनआरटी फुटबल क्लब, बागमती युवा क्लब र एभिनियर एफसी रहेको छ भने समूह बी मा फ्रेण्ड्स क्लब, नवजागृति युवा क्लब, रिगल रिसोर्ट हेटौंडा मकवानपुर–११, सातदोबाटो क्लब, मनाङ मस्र्याङ्दी क्लब र त्रिभुवन आर्मी क्लब रहेको छ ।
प्रतियोगिताको उपाधि विजेताले १५ लाख रुपैयाँ र उपविजेताले १० लाख रुपैयाँ प्राप्त गर्नेछ । प्रतियोगिताको सर्वोत्कृष्ट खेलाडीले नगद ५० हजार रुपैयाँ प्राप्त गर्नेछन् भने विधागत उत्कृष्ट खेलाडीहरुले २५–२५ हजार रुपैयाँ प्राप्त गर्नेछन् । मकवानपुर जिल्ला फुटबल संघका अध्यक्ष टीका लामाको सभाध्यक्षमा भएको प्रतियोगिताको उद्घाटन कार्यक्रम हेटौंडा उपमहानगरपालिकाका उपप्रमुख राजेश बानियाँ, निवर्तमान नगर प्रमुख हरि बहादुर महत लगायतको उपस्थिति रहेको थियो ।
