हेटौंडाः बागमती प्रदेशको राजधानी सहर हेटौंडा उपमहानगरपालिका बालमैत्री पालिका घोषणाको तयारीमा जुटेको छ । बालमैत्री पालिका घोषणाका लागि महत्वपूर्ण ५१ वटा सूचक पूरा भएको अवस्थामा बालमैत्री पालिका घोषणा गर्न सकिन्छ । बालमैत्री पालिका घोषणाका लागि ५१ वटा सूचकले वृहत विषयलाई समेटेको छ । ती सूचकमध्ये प्रमुख मुद्दा भनेको बालश्रम निषेध हुनुपर्ने, बालविवाह हुन नहुने, विद्यालय जाने उमेरका बालबालिकाले विद्यालयमा भयरहित शिक्षा पाउनुपर्नेलगायत छन् ।
बालमैत्री पालिका घोषणाको तयारी भइरहँदा चालु आर्थिक वर्षको पहिलो ४ महिनामा हेटौंडा अस्पतलामा २० वर्षभन्दा कम उमेरका ८८ जना किशोरी आमा बनेका छन् । साउनमा २० जना, भदौमा ३० जना, अजोसमा १८ जना र कात्तिकमा २० जना किशोरीले सन्तान जन्माएको हेटौंडा अस्पतालको प्रसुती वार्डकी इन्चार्ज देवकी खतिवडाले जानकारी दिनुभयो । कतिपय किशोरी (२० वर्षभन्दा कम उमेरमै) दोस्रो सन्तान जन्माउन अस्पताल आइपुग्ने इन्चार्ज खतिवडाले बताउनुभयो ।
सरकारले २० वर्षभन्दा कम उमेरमा विवाह गर्नुलाई गैरकानुनी मान्दै विवाह गर्ने, गराउनेलाई दण्डको व्यवस्था गरे पनि कार्यान्वयनमा आउन सकेको छैन । कानुन कार्यान्वयन गर्नुपर्ने निकाय, जनप्रतिनिधि, नागरिक समाज, अभिभावक गैरजिम्मेवार बन्दा किशोरीहरुले जोखिम व्यहोर्न बाध्य छन् । ३० बेड क्षमताको हेटौंडा अस्पतालको प्रसुती सेवामा कात्तिक महिनामा ३ सय ११ जना गर्भवतीले प्रसुती सेवा लिएका छन् । हेटौंडा अस्पतालमा ५ जना विशेषज्ञ चिकित्सकले महिला तथा प्रसुती स्वास्थ्य सेवा प्रदान गरिरहेका छन् ।
