हेटौंडाः आसन्न प्रतिनिधि सभा सदस्य तथा प्रदेश सभा सदस्य निर्वाचनको सन्दर्भमा हिमालय टेलिभिजनले हेटौंडामा शनिबार बिहान आयोजना गरेको निर्वाचन महासंग्राम बहस कार्यक्रमलाई हाम्रो नेपाल पार्टीका उम्मेदवारहरुले अवरोध गरेका छन् ।
आफ्नो पार्टीका नेता र उम्मेदवारलाई मञ्चमा नराखेको भन्दै हाम्रो नेपाल पार्टीबाट प्रतिनिधि सभा सदस्यमा मकवानपुरको निर्वाचन क्षेत्र नम्बर १ बाट उम्मेदवारी दिएका दिपेन्द्र चन्द ठकुरी र मकवानपुरको निर्वाचन क्षेत्र नम्बर १ को ‘ख’ बाट प्रदेश सभा सदस्यमा उम्मेदवारी दिएका किशोर अर्यालसहितको समूहले कार्यक्रममा अवरोध गरेका हुन् । अभिव्यक्ति स्वतन्त्रता र प्रेस स्वतन्त्रतामाथि समेत अवरोध हुने गरी ठकुरीको समूहले टेलिभिजन कार्यक्रममा अवरोध गरेका छन् ।
प्रस्तोता राजेन्द्र बानियाँले कार्यक्रम सञ्चालन गर्न सुरु गरेलगत्तै ठकुरीले ठूला दललाई मात्रै मञ्च उपलब्ध गराएको आफ्नो दललाई अवसर नदिएको भन्दै कार्यक्रममा अवरोध गरेका थिए । कार्यक्रम प्रस्तोता बानियाँले कार्यक्रमका प्रदेश नम्बर १ र मधेश प्रदेशमा महासंग्राम सञ्चालन गरेर बागमती प्रदेशको राजधानी हेटौंडामा बहस गर्न लागिएको र कात्तिक ३० गतेसम्ममा बाँकी ४ वटा प्रदेशमा पनि बहसको कार्यक्रम सकिने जानकारी गराउँदा गराउँदै ठकुरीले अवरोध गरेका थिए ।
प्रत्यक्ष प्रसारण भइरहेको कार्यक्रममा अवरोध भएपछि कार्यक्रम नै बिथोलिएको थियो । कार्यक्रम प्रस्तोता बानियाँले केही दलका प्रतिनिधि र विश्लेषकलाई मञ्चमा राखिए पनि कार्यक्रम सञ्चालन गरिएको हलमा सहभागी सबै दलका नेता, उम्मेदवार र सहभागीलाई बोल्ने अवसर दिइने बताएका थिए । कार्यक्रम प्रस्तोताको आग्रहलाई बेवास्ता गर्दै ठकुरीसँगै अर्याल र उनीहरुका समर्थकले अवरोध जारी राखेका थिए । उनीहरुको अवरोधकै कारण करिब ९ मिनेटपछि प्रत्यक्ष प्रसारण नै रोकेर कार्यक्रम स्थगित गरिएको थियो ।
कार्यक्रम प्रस्तोता राजेन्द्र बानियाँले पटक–पटक आग्रह गर्दा पनि ठकुरीले मञ्च अगाडि नै गएर अवरोध गरे । ठकुरीले टेलिभिजन कार्यक्रम अवरोध गर्नुका साथै गम्भीर आरोप समेत लगाएका छन् । हिमालय टेलिभिजन र टेलिभिजनमा आवद्ध पत्रकारले लाखौं रुपैयाँ लिएर सीमित उम्मेदवार र पार्टीका नेतालाई मात्रै बहसमा सहभागी हुन अवसर दिएको ठकुरीले आरोप लगााएका छन् । दलाल पत्रकारिता, निरंकुश पत्रकारिता भएको भन्दै ठकुरीले लाखौं रकम लिएको आरोप लगााएका छन् । कार्यक्रम नियोजित भएको भन्दै ठकुरीले भने, ‘यो कार्यक्रम नियोजित हो । कति लाख लिएर कार्यक्रम गरेको हो ? शेरबहादुर देउवा र हाम्रो बराबर हैसियत छ ।’
हिमालय टेलिभिजनमा लोकप्रिय यक्ष प्रश्न कार्यक्रमका प्रस्तोता राजेन्द्र बानियाँले दलाल पत्रकारिता गरेको, बहसमा सहभागीसँग लाखौं रुपैयाँ लिएको भन्ने जस्ता आरोप लगाइएको भन्दै दुख व्यक्त गरेका छन् । लोकप्रिय प्रस्तोतामाथि गम्भीर आरोप लगाउँदै टेलिभिजन कार्यक्रम नै अवरोध गरेकोप्रति ठकुरीको समूहको आलोचना भइरहेको छ । ठकुरीको समूहले अवरोध गरेको कार्यक्रमको अंश युट्युवमा हेर्न सकिन्छ ।
स्थानीय तह निर्वाचनमा स्वतन्त्र उम्मेदवारी दिएर लौरो चिन्हबाट काठमाडौं महानगरपालिकामा बालेन्द्र साह र धरान उपमहागरपालिकामा हर्क साम्पाङ निर्वाचित भएको पृष्ठभूमिमा ठकुरी र अर्यालले सामाजिक सञ्जालमा आफ्नो पार्टीको लौरो चुनाव चिन्ह मात्रै राखेर राजनीतिक दलको नाम भने उल्लेख गरेका छैनन् । मतदातालाई स्वतन्त्र उम्मेदवारको रुपमा प्रभावित पार्न पनि उनीहरुले दलको नाम उल्लेख गरेका छैनन् ।
