हेटौंडाः गन्तव्यसम्म जाने क्रममा हेटौंडा आइपुगेका यात्रुलाई श्रीकृष्ण प्रणामी समाज मकवानपुरले आजदेखि खाना खुवाउन सुरु गरेको छ । आज बिहानदेखि हेटौंडा–४, सुमार्गी कम्प्लेक्स अगाडि सडक छेउमै खाना खुवाउन सुरु गरेको हो । प्रणामी समाजले खाना खुवाउनुका साथै गन्तव्यसम्म जानका लागि उपलब्ध हुन सक्ने यातायातका साधनमा पठाउने कार्य समेत गरेको छ । प्रहरीसँगको समन्वयमा यातायात सेवामा समेत सहजीकरण गरिएको प्रणामी समाजका सदस्य बद्रिप्रसाद चौलागाईले जानकारी दिनुभयो । यातायात व्यवसायी समेत रहनुभएका चौलागाईका अनुसार आज छिमेकी जिल्ला बारा, पर्सासँगै एक समूहलाई पश्चिम कोहलपुर जाने व्यवस्था मिलाइएको छ ।
