हेटौंडाः नेकपा एमाले मकवानपुरले आसन्न प्रदेश तथा संघीय निर्वाचनका लागि निर्वाचन परिचालन कमिटी गठन गरेको छ । बुधबार पार्टी कार्यालयमा पत्रकार सम्मेलनको आयोजना गरेर संविधान सभा सदस्य अनन्त पौडेलको संयोजकत्वमा ७ सय ५१ सदस्यीय जिल्ला निर्वाचन परिचालन कमिटी गठन गरेको जनाएको छ । निर्वाचन परिचालन कमिटी गठनसँगै निर्वाचन कार्यालयको पनि उद्घाटन गरिएको छ ।
नेकपा एमाले मकवानपुरका अध्यक्ष एकालाल श्रेष्ठले जिल्ला निर्वाचन परिचालन कमिटीसँगै संघीय तथा प्रदेश निर्वाचन क्षेत्रस्तरीय निर्वाचन कमिटी, पालिका, वडा र बुथस्तरीय निर्वाचन परिचालन कमिटी गठन गरिने जानकारी दिनुभयो । जिल्ला निर्वाचन परिचालन कमिटीको सहसंयोजकमा एकालाल श्रेष्ठ, सचिवमा नवीन सिग्देल रहनुभएको छ ।
यस्तै प्रतिनिधि सभा सदस्य निर्वाचन क्षेत्र नम्बर १ को संयोजकमा रामचन्द्र राई, सचिवमा अनिलकुमार बानियाँ, क्षेत्र नम्बर २ को संयोजकमा सुवासचन्द्र ठकुरी, सचिवमा मेम्बर लोलाई जिम्मेवारी दिइएको अध्यक्ष श्रेष्ठले जानकारी दिनुभयो । प्रदेश सभा १ को ‘क’ को संयोजकमा दिलबहादुर घिसिङ, सचिवमा कृष्णप्रसाद चौलागाई, १ को ‘ख’ को संयोजकमा रघुनाथ खुलाल र सचिवमा ईन्द्रप्रसाद नेपाल, प्रदेश सभा २ को ‘क’ को संयोजकमा बलराम बल, सचिवमा पार्वती राना, २ को ‘ख’ को संयोजकमा एकराज उप्रेती र सचिवमा नरेन्द्र लाल रिजाललाई जिम्मेवारी दिइएको छ ।
पार्टीको पालिकास्तरीय कमिटीले नै पालिकास्तरीय निर्वाचन परिचालन कमिटी गठन गर्ने बताइएको छ । निर्वाचनको प्रचारप्रसारका लागि पार्टी कार्यालयमै प्रतिनिधिसभा १ र २ को कार्यालय रहने जानकारी दिनुहुँदै पार्टी जिल्ला अध्यक्ष एकालाल श्रेष्ठले भन्नुभयो, ‘प्रदेश सभा १ को ‘क’ को कार्यालय बकैया गाउँपालिकाको हात्तिसुँडेमा स्थापना गरिनेछ । प्रदेश सभा १ को ‘ख’ को कार्यालय जिल्ला पार्टी कार्यालयमै रहनेछ भने प्रदेश सभा २ को ‘क’ को कार्यालय थाहा नगरपालिकाको पालुङमा रहने छ भने २ को ‘ख’ को कार्यालय मनहरीमा हुनेछ ।’
निर्वाचन परिचालन कमिटीले घोषणापत्रको तयारी गरी नेकपा एमालेको औचित्यका बारेमा मतदातासम्म सन्देश पुर्याउने दावी गरिएको छ । पार्टी संरचनालाई जनतासम्म व्यवस्थित रुपमा पुर्याएर मुलुक जोगाउन एमालेले नै जित्नुपर्ने सन्देश मतदातासम्म पुर्याइने जिल्ला अध्यक्ष श्रेष्ठले बताउनुभयो । निर्वाचन परिचालन कमिटी घोषणा तथा कार्यालय उद्घाटन कार्यक्रममा पार्टीको केन्द्री, प्रदेश, जिल्ला र पालिकास्तरीय नेतृत्वको सहभागिता रहेको थियो ।
