नेपाली साहित्यमा विशिष्ट हास्यव्यङ्ग्यकारको रूपमा प्रसिद्धि कमाएका भैरव अर्यालको जन्मपिता होमनाथ अर्याल र माता खेमकुमारी अर्यालको कोखबाट ललितपुरको कुपण्डोलमा वि.सं. १९९३ असोज ५ गते भएको थियोे । उहाँका ३ छोरा, ३ छोरीसहित ८ जनाको परिवार रहेको र गोरखापत्र संस्थानको सानो जागिरबाट सम्पूर्ण खर्च पुर्याउन पर्ने भएकोले आर्थिक अभावको रोटेपिङमा सधैं रिङ्नु पर्ने अवस्था थियो ।
प्रतिभा पत्रिकामा नयाँ जीवन कविता (२००९) मा प्रकाशन गरेर साहित्यिक फाँटमा उदाएका अर्यालका काउकुति (२०१९), जयभुँडी (२०२२), गलबन्दी (२०२६), इतिश्री (२०२८), दस औतार (२०३३), भैरव अर्यालका हास्यव्यङ्ग्यहरू (२०५९) र विष्णु प्रभावद्वारा सम्पादित टेढो ऐना (२०६३) हुन् ।
त्यसैगरी उहाँले अन्य विधाका थुप्रै कृतिहरूको सिर्जना, समालोचना र सम्पादन समेत गर्नु भएको छ । के के भयो (२०१६), उपवन (२०१८), राष्ट्रिय आव्हान (२०१८), विरही राम (२०२०) साझा कथा (२०२५), छ्याकन (२०२५), साझा निबन्ध (२०२६), प्रवेशिका निबन्ध (२०२७), नेपाली काव्यमा प्रकृति (२०३०), कारिन्दाको दिनचर्या (२०६८) र भैरव अर्यालका समालोचनाहरू (२०६९) हुन् । त्यसैगरी रत्नश्री, रचना, हालखबर, गोरखापत्र, मधुपर्क आदि पत्रिकाहरूको सम्पादनमा समेत संलग्न हुनुहुन्थ्यो । २०२२ सालमा नेपाल राष्ट्रिय प्रज्ञा प्रतिष्ठानले आयोजना गरेको कविता महोत्सवमा अर्याल प्रथम हुनु भएको थियोे ।
“म दिनदिन भर–
आफ्ना छिनहरू बेच्तै हिँड्छु,
आफ्ना दिनहरू बेच्तै हिँड्छु
मानौं बेसाउनु छ मैले एकरात स्वास्नीसँग
किन्नु छ केही रात जिन्दगीसँग, जगतसँग
शताब्दीको शर्त नै यस्तैयस्तै छ आज
एक अहोरात्रको पनि बहाल तिर्नुपर्छ मैले सृष्टिलाई
त्यसैले त यहाँ आफैंलाई किन्न
बेच्नुपर्दछ मैले आफैंलाई, आफैंलाई ।”
…भन्ने जस्ता मर्मस्पर्शी भावले भरिएका सिर्जनाहरू उमार्ने र साहित्यको फाँटमा लटरम्म पार्ने विशेष आँट भएका नेपाली हास्यव्यङ्ग्य साहित्यका शाश्वत शिल्पी भैरव अर्यालले सायद आफैलाई केन्द्रमा राखेर यी कालजयी हरफहरू सिर्जना गर्नु भएको हुन सक्छ । शारीरिक रूपमा अग्लो फूर्तिलो जिउडाल भएका भए पनि रोग तथ भोकले आक्रान्त अर्यालले निराश जीवनलाई अल्पायुमै पूर्णविराम दिनुभयो । गोकर्णेश्वर पुलबाट बाग्मती नदीमा हामफालेर वि.सं. २०३३ असोज १९ गते मृत्युुवरण गर्नु भयो ।
आज मिति २०७९ असोज ५ गते भैरव स्मृति दिवस । उनै महान हास्यव्यङ्ग्य शिल्पी भैरव अर्यालको प्रतिमामा मल्यार्पण गरी उहाँलाई सम्झने कार्यक्रम रहेको हुँदा सम्पूर्ण साहित्यकार, पत्रकार एवम् साहित्यप्रेमी महानुभावहरूलाई बिहान ७ः०० बजे हेटौंडा ५ पुष्पलालपार्कस्थित भैरव अर्यालको प्रतिमा रहेको स्थानमा उपस्थित भैदिनु हुनु हार्दिक अनुरोध छ ।
