हेटौंडाः पेशागत बिमा अभिकर्ता नेपाल विमक समिति नेपाल लाइफ इन्सुरेन्स कम्पनी लिमिटेडको केन्द्रीय कार्य समितिको अध्यक्षमा गणेश अधिकारी निर्विरोध निर्वाचित हुनुभएको छ । आज हेटौंडामा सम्पन्न संघको तेस्रो अधिवेशनबाट अधिकारी केन्द्रीय अध्यक्षमा निर्विरोध निर्वाचित हुनुभएको हो ।
संघको वरिष्ठ उपाध्यक्षमा चन्द्र बहादुर खड्का, उपाध्यक्षमा महेन्द्र प्रसाद यादव, सचिवमा ओम बहादुर केसी, सहसचिवमा रामशरण पोखरेल र कोषाध्यक्षमा तेजमणी तिमल्सिना निर्विरोध निर्वाचित भएका छन् । संघको कार्यसमितिमा अन्य १० जना सदस्यहरु निर्विरोध भएसँगै १६ जनाको कार्यसमिति बनेको छ । शनिबार निर्वाचन अधिकृतको कार्यालयले उम्मेदवारी मनोनयन दर्ताका लागि जारी गरेको सूचना अनुसार १६ जनाले उम्मेदवारी दर्ता गराएका थिए । उम्मेदवारी दर्तामाथि दाबी विरोध नपरेको हुँदा निर्वाचन अधिकृत सिताराम पन्तले उम्मेदवारी परेकाहरुलाई निर्विरोध निर्वाचित भएको घोषणा गर्नुभएको हो ।
नवनिर्वाचित कार्यसमितिले शनिबार नै हेटौंडामा पत्रकार सम्मेलन गरेको छ । पत्रकार सम्मेलनमा बोल्नुहुँदै नवनिर्वाचित अध्यक्ष गणेश अधिकारीले यसअघिको कार्यसमितिले अधिवेशनमा आर्थिक प्रतिवेदन पेश गर्न नसकेको आरोप लगाउनुभयो । संघको २०७२ सालदेखि हालसम्मको खर्च विवरण सार्वजनिक गर्न माग गर्दा पूर्व कार्यसमितिहरु अधिवेशनमा सहभागी नभएर भागेको उहाँले आरोप लगाउनुभएको छ ।
