हेटौंडाः बागमती प्रदेशका मुख्यमन्त्री राजेन्द्रप्रसाद पाण्डेले औद्योगिक प्रस्ताव लिएर आए प्रदेश सरकार सहयोग गर्न तयार रहेको बताउनुभएको छ । शुक्रबार नेपाल उद्योेग वाणिज्य महासंघ बागमती प्रदेशको पाँचौं प्रदेशसभामा बोल्दै मुख्यमन्त्री पाण्डेले स्वदेशी उद्योगको उत्पादनमा जोड दिनुपर्ने बताउनुभएको छ ।
मुख्यमन्त्री पाण्डेले हेटौंडा कपडा उद्योग पुनः सञ्चालनमा ल्याउने प्रस्ताव आफ्नै भएको दावी गर्नुभएको छ । स्वदेशी उद्योग सञ्चालन गरी हजारौंको संख्यामा रोजगारी सृजना गर्न सकिने भएकाले प्रस्ताव ल्याएको पाण्डेको भनाई छ । सरकारले वैदेशिक रोजगारीमा जाने वा स्वदेशमै काम गर्ने युवा मजदुर वर्गलाई सीप विकास तालिम दिने बताउनुभयो । अघिल्लो बर्ष ९ खर्ब ६१ अर्ब रेमिट्यान्स भित्रिएको भन्दै सीप प्राप्त व्यक्ति स्वदेशी वा वैदेशिक रोजगारीमा भए ३ गुणा बढी आयआर्जन गर्न सकिने पाण्डेको भनाई छ ।
उद्योग नहुनेहरु उद्योग महासंघको नेता हुन नहुने मुख्यमन्त्री पाण्डेले बताउनुभयो । आफ्नो उद्योगबाट उत्पादन नगर्ने, अरुको सामान बेच्ने भए नेपाल उद्योग वाणिज्य महासंघमा नेपाल उद्योग हटाएर वाणिज्य महासंघमात्र नामाकरण गर्दा हुने पाण्डेले बताउनुभयो । उद्योगी र सरकार प्रतिपक्षी नभई एउटै रथको दुई पाङ्ग्रा रहेको उहाँले बताउनुभयो । उद्योग क्षेत्रमा काम गर्ने कामदार, कर्मचारीलाई पाठशाला स्थापना गरी शिक्षित बनाउन उहाँले सुझावसमेत दिनुभयो ।
कार्यक्रममा उद्योगी व्यवसायीहरुले अर्थतन्त्रको तरलताले उद्योग व्यवसाय गर्न अप्ठ्यारो भएको बताएका छन् । व्याजदर वृद्धि गर्न बैंक पनि सहमत नरहेको उद्योगीहरुको भनाई छ । उद्योग वाणिज्य संघले सरकार र बैंकसँग समन्वय गरेपनि निश्कर्ष नपाएको उद्योगीले गुनासो गरेका छन् । व्याजदर वृद्धिले उत्पादन लागतमा दोब्बर लाग्ने गरेकाले व्याजदर घटाउन उद्योगी व्यवसायीले माग गरेका छन् । सरकारी कर्मचारी खुशी पार्न नसके आफ्नै पैसा लिन पनि अप्ठ्यारो हुने व्यवसायीहरुको गुनासो छ ।
मेला महोत्सव गर्न उद्योगीहरुलाई नै दिनुपर्ने उद्योगीहरुको माग रहेको छ । साना व्यापारीहरुले मेला महोत्सव गर्दा ठूला उद्योगीहरु मारमा परेकाले मेला महोत्सव सञ्चालनमा आधिकारिक ऐन नीति ल्याउनुपर्ने उहाँको भनाई छ । सरकारले उद्योग क्षेत्रलाई भाषणमा मात्र ल्याउने र प्रोजेक्ट नल्याउने गरेको उद्यमीहरुको आरोप छ ।
