हेटौंडाः आसन्न स्थानीय तहको निर्वाचनमा ५ दलीय गठबन्धनमा नेपाली कांग्रेस केन्द्रीय समितिले गरेको सहमतिको विपक्षमा कांग्रेस हेटौंडा उपमहानगर समिति उभिएको छ । गठबन्धन दलबीच हेटौंडा उपमहानगरपालिकाको मेयरमा नेकपा एकीकृत समाजवादीको तर्फबाट उम्मेदवारी रहने निर्णय भएकोप्रति कांग्रेस हेटौंडा उपमहानगर समितिले ध्यानाकर्षण भएको जनाएको छ ।
कांग्रेस हेटौंडा उपमहानगर समितिले मंगलबार हेटौंडा उपमहानगरका १९ वटै वडा सभापतिको उपस्थितिमा बैठक गरेर मित्रवत् प्रतिस्पर्धामा जाने निर्णय समेत गरेको दावी गरेको छ । बुधबार कांग्रेस हेटौंडा उपमहानगर समितिले पत्रकार सम्मेलन गरेर पालिकास्तरमै गठबन्धन दलबीच छलफल चलिरहँदा केन्द्रीय समितिले स्थानीय मर्म र भावनालाई बेवास्ता गर्दै केन्द्रमा सहमति भएको जनाएको छ ।
नगरको गठबन्धनमा आवद्ध दलहरुमध्ये सबैभन्दा ठूलो पार्टी नेपाली कांग्रेसको नेतृत्वमा चुनावमा सहभागी हुन गठबन्धनका दलहरु समेत तयारी रहेको अवस्थामा केन्द्रीयस्तरमा भएको भागबण्डाले गठबन्धनको आवश्यक्ता र औचित्य समेत पूरा गर्न नसक्ने दावी पनि उपमहानगर समितिले गरेको छ । नेपाली कांग्रेस हेटौंडा उपमहानगर समितिका सभापति उत्सव इटेनीले विज्ञप्ति नै जारी गर्नुभई केन्द्रीय गठबन्धनको निर्णयप्रति असहमति जनाउनुभएको छ ।
