हेटौैंडाः बागमती प्रदेश प्रहरी कार्यालयले प्रहरी हबल्दार यमकुमार बस्नेतलाई फागुन महिनाको सर्वोत्कृष्ट प्रहरी घोषित गरेको छ । जिल्ला प्रहरी कार्यालय दोलखामा कार्यरत प्रहरी हबल्दार बस्नेतलाई बुधबार फागुन महिनाको सर्वोत्कृष्ट प्रहरी घोषित गरेको हो । हबल्दार बस्नेतलाई प्रदान गरेको जिम्मेवारी इमानदारी एवम् प्रशंसनीय ढङ्गबाट सम्पादन गरेको जनाइएको छ ।
फागुन १३ गते दोलखा जिल्लाको भीमेश्वर नगरपालिका–३ जलदेवी मन्दिर नजिकै जंगलमा दुवै हात, खुट्टाहरु र अनुहारमा सेता कपडाको टेपले बाँधिएर मृत अवस्थामा फेला परेको सोही नगरपालिका २ नम्बर वडाका १६ बर्षीय साहिल तामाङको घटनामा संलग्न रहेका तीन जना बालकहरुलाई विशेष सुचना संकलन गरी पक्राउ गर्न सफल भएको, फाल्गुन १४ गते बा ५ ख २४१२ नम्बरको ट्रकलाई सल्लाको तयारी खापा ३० थानसहित चालकलाई पक्राउ गरी कानुनी दायरामा ल्याउन सफल भएको लगायत कार्यको मुल्याङ्कन गर्दै बस्नेतलाई उत्कृष्ट प्रहरी घोषणा गरिएको जनाइएको छ ।
प्रदेश प्रहरी कार्यालयले हरेक महिना प्रदेशकै सर्वोत्कृष्ट प्रहरी घोषित गर्नुका साथै मातहतका इकाईलाई पनि इकाईगतरुपमा महिनाको उत्कृष्ट प्रहरी कर्मचारी घोषित गरी प्रोत्साहित गर्न निर्देशन दिएको छ ।
