हेटौंडाः मकवानपुरको हेटौंडा उपमहानगरपालिका ११ नवलपुरमा रहेको पर्यटकीय स्थल शहीद स्मारकमा अहिले आन्तरिक एवम् बाह्य पर्यटकहरूको चहलपहलमा कमी आएको छ । कोभिड महामाहरी सुरु भएसँगै पर्यटकहरुको चहलपहलमा केही कमी आएको हो । समुदायबाट स्थापित एवम् सञ्चालित करिब २० हेक्टर क्षेत्रफलमा फैलिएको स्मारक क्षेत्र मकवानपुरकै एक महत्वपूर्ण गन्तव्य पनि हो ।
हेटौंडाबाट ७ किलोमिटरको दूरीमा रहेको शहीद स्मारकको २०५१ माघ १७ गते तत्कालीन प्रधानमन्त्री मनमोहन अधिकारीले उद्घाटन गर्नुभएको थियो । शहीद स्मारकमा अहिले दैनिक २ सयदेखि ३ सयसम्म आन्तरिक एवम् बाह्य पर्यटक घुम्न आउने गरेको स्मारक व्यवस्थापन समितिका टिकट बिक्रेता नवराज ढकालले बताउनुभयो । आन्तरिक र बाह्य पर्टटक आगमन हुने मुख्य सिजनमा पनि यतिबेला कोभिड महामारीले गर्दा पर्यटकको आगमन घटेको उहाँको भनाई छ ।
कोभिड महामारीभन्दा अगाडि स्मारकमा दैनिक १ हजारभन्दा बढी पर्यटक अवलोकनका लागि आउने गर्दथे । यस समयमा बढी मानिसहरु पिकनिक खान आउने भएपनि केही वर्षयता स्मारकमा आउने पर्यटक नै घट्न थालेको ढकालको भनाई छ । स्मारकमा सार्वजनिक बिदा र शनिबारका दिन भने पर्यटकहरु बढी आउने गर्दछन् । अहिले स्मारक प्रवेश गर्दा पूर्णरुपमा स्वास्थ्य मापदण्ड पालना गर्नुपर्ने जनाइएको छ । अनिवार्य मास्क लगाएर एकआपसमा भौतिक दुरी कायम गर्नुपर्नेछ ।
प्रतिव्यक्ति टिकटको शुल्क ५० रुपैयाँ, मोटरसाइकल पार्किङको २० रुपैयाँ, चारपाङ्ग्रे गाडीहरुलाई ५० रुपैयाँ लिने गरेको जनाइएको छ । टिकटबाट मासिक करिब ८ लाख बराबरको आम्दानी हुने गरेको छ । स्मारकमा २८ जना कर्मचारी रहेकोमा मासिक तलबमा मात्र ५ लाख रुपैयाँ खर्च हुने गरेको ढकालले बताउनुभयो ।
स्मारकमा नेपाली इतिहासको विभिन्न कालखण्डमा शहीद भएकाहरुको प्रतिमा हेर्न सकिनेछ । यस्तै शहीद ग्यालरी, आकर्षक शहीद स्तम्भ, दृश्यावलोकन टावर, चिडियाघर, स्वीमिङपुल र विभिन्न मनोरञ्जनात्मक खेलहरु रहेका छन् । यस्तै चित्तल, मृत, बेलायती मुसा, खरायो, बाँदर, मृग, गोही, चितुवालगायतका जन्तुहरु र मयूर, कालिज, परेवा, अस्ट्रिजलगायतका पक्षीहरुको अवलोकन गर्न सकिनेछ ।
