हेटौंडाः कोभिड–१९ संक्रमणका कारण जिल्ला प्रशासन कार्यालय मकवानापुरले बन्द गरेको कार्यालयबाट प्रवाह हुने सेवाहरुमा केही खुकुलो बनाएको छ । कार्यालयले शुक्रबार एक सूचना जारी गरी जनस्वास्थ्यका मापदण्डहरु पालना गर्दै सिमित कर्मचारीको उपस्थितिमा सिमित सेवाहरु प्रवाह गर्ने जनाएको हो ।
माघ १६ गते आइतबारदेखि राहदानीको लागि प्रत्यक्ष विवरण भर्ने कार्य गर्न आउँदा अनिवार्य अनलाइनबाट नै पूर्वअनुमति लिएरमात्र कागजपत्रसहित आउन कार्यालयले सूचित गरेको छ । साथै राष्ट्रिय परिचयपत्र बनाउन राहदानीको अनलाइनबाट नै पूर्वअनुमति लिएका व्यक्तिहरु मात्र सो सम्बन्धी कागजातसहित आउन पनि कार्यालयले जानकारी गराएको छ । यसैगरी नयाँ नागरिकता, प्रतिलिपि नागरिकतालगायतका अन्य सेवाहरुको सन्दर्भमा अत्यावश्यक परेका व्यक्तिहरु मात्र आवश्यक कागजातसहित सेवा लिन आउन निर्देशन दिइएको छ ।
कुनै कामको लागि एक हप्ताभित्रमा नागरिकतालगायतका कागजात प्रस्तुत गर्नुपर्ने कार्यलाई मात्र अत्यावश्यक मानिने सहायक प्रमुख जिल्ला अधिकारी बद्रीनाथ गैह्रेले जानकारी दिनुभयो । यसका लागि नागरिकता वा अन्य कागजात पेश गर्नुपर्ने कार्यालयबाट वा सम्बन्धित निकाय वा वडा कार्यालयबाट अत्यावश्यक रहेको लिखित पत्र पेश गर्नुपर्ने पनि उहाँले बताउनुभयो । यसैगरी कार्यालयको मुख्य प्रवेशद्वार बिहान साढे ९ बजेबाट मात्र खुल्ने भएकाले सो समयभन्दा अगाडि आएर भिडभाड नगर्न र कार्यालयमा सेवा लिन आउँदा अनिवार्यरुपमा खोप लगाई खोप कार्डसमेत लिई अन्य जनस्वास्थ्यका मापदण्ड पालना गरेर मात्र कार्यालयमा प्रवेश गर्न अनुरोध गरिएको छ ।
