हेटौंडाः नेपाली कांग्रेसको १४ औं महाधिवेशन अन्तर्गत मकवानपुरको प्रतिनिधि सभा निर्वाचन क्षेत्र अन्तर्गत महाधिवेशन प्रतिनिधिका लागी भएको मतदानबाट नेपाली कांग्रेस मकवानपुरका पार्टी सभापति इन्द्रबहादुर बानियाँ सर्वाधिक मतसहित निर्वाचित हुनुभएको छ । क्षेत्र नं. १ मा कुल ७ सय ४८ मत खसेकोमा मंगलबार बिहान सम्पन्न मतगणना अनुसार महाधिवेशन प्रतिनिधिका लागी खुल्ला पुरुष तर्फ बानियाँ सर्वाधिक ६ सय ७६ मत सहित निर्वाचित हुनुभएको हो ।
मकवानपुरमा नेपाली कांग्रेसको प्रतिनिधि सभा क्षेत्र नं. १ को निर्वाचन क्षेत्र अन्तर्गत क्षेत्रिय समिति र महाधिवेशन प्रतिनिधिका लागी भएको निर्वाचनको मत परिणाम आएको छ । महाधिवेशन प्रतिनिधिका लागी खुल्ला पुरुषतर्फ बाट बानियाँसँगै आनन्दराम पराजुली, अमृतकुमार लामा, बिष्णु कुमार लामिछाने, दिनेश उपाध्याय, रघुरमण न्यौपाने, प्रभात कुमार दाहाल, माइक रामचन्द्र अर्याल, रामबाबू बानियाँ र तारा चन्द बजगाई विजयी भएका छन् । उहाँहरुले क्रमशः ६११, ५७७, ४९३, ४८६, ४८४, ४५५, ४५५, ४४१ र ४०५ मत प्राप्त गर्नुभएको थियो ।
महाधिवेशन प्रतिनिधिका लागी प्रत्यासी रहेका शेर बहादुर लामा, राजु खतिवडा, होम नाथ गौतम र चोक बहादुर ठाँडा मगरले भने क्रमशः ३९६, ३८९, ३०७ र २६९ मत प्राप्त गरेपनि पराजित भएका छन् । यसैगरी खुल्ला महिला तर्फ उर्मिला पुलामी, प्रबित्रा बिक, अन्जना उपाध्याय र मिरा बन्जारा क्रमशः ५९७, ५८३, ४८७ र ४७२ मतसहित विजयी भएका छन् । महिला खुल्लामा प्रत्यासी रहेकी नेपाली कांग्रेसकी नेतृ रिता खनाल भने ३८८ मत प्राप्त गर्दै पराजित हुनुभयो । यस्तै प्रत्यक्ष जनजाती पुरुष तर्फ भएको मतदानबाट ४९६ मतसहित चम्पुरत्न लामा, ४५६ मतसहित अशोक राज शाक्य र ४७० मतसहित शुभात थिङ विजयी भएका छन् ।
नेपाली कांग्रेस मकवानपुरको क्षेत्रिय समितिको सचिवमा ५५४ मतसहित दोर्जे लामा स्याङतान र ४९९ मतसहित कविन संगामी विजयी भएका छन् । सचिवमा पराजित भएका अर्का प्रत्यासी रमेश ढकालले २५५ मत प्राप्त गरे । यसअघि, सोमबार भएको प्रतिनिधिसभा निर्वाचन क्षेत्र नम्बर १ को सभापतिमा दामोदर खनाल सर्वसम्मत निर्वाचित हुनुभएको छ । मकवानपुरको प्रतिनिधिसभा क्षेत्र नम्बर १ सभापतिमा धर्मराज लामिछानेले पनि उम्मेदवारी दिनुभएको थियो । तर उहाँले आफ्नो उम्मेदवारी फिर्ता लिएसँगै खनाल निर्विरोध निर्वाचित हुनुभएको हो । देउवा पक्षका खनालसँगै सहसचिवमा ईन्द्रबहादुर मोक्तान र मुना पाठक कठायत निर्विरोध निर्वाचित हुनुभएको छ ।
महाधिवेशन प्रतिनिधितर्फ खसआर्य खुलामा केशवप्रसाद धिताल र मिठाराम दाहाल निर्विरोध हुनुभयो । खसआर्य महिलातर्फ राधा कोइराला निर्विरोध हुनुभयो भने जनजाति महिलातर्फ लक्ष्मी श्रेष्ठ, लक्ष्मी थिङ र अमृता थापा निर्विरोध निर्वाचित हुनुभयो । दलिततर्फ गोपीलाल विक र अल्पसंख्यकतर्फ रूद्र ढकाल खान निर्विरोध हुनुभएको छ । कार्यसमितिमा २५ जना र महाधिवेशन प्रतिनिधि २५ जना गरी प्रतिनिधिसभा क्षेत्र नम्बर १ बाट कुल ५० जना निर्वाचित भएका छन् ।
प्रतिनिधिसभा निर्वाचन क्षेत्र नम्बर २ को मतगणना भने नेपाली कांग्रेस मकवानपुरको पार्टी कार्यालयमा चलिरहेको छ । अहिले क्षेत्र नं. २ अन्तर्गत महाधिवेशन प्रतिनिधीको मतगणना भइरहेको नेपाली कांग्रेस बकैया–१ का सभापति बुद्ध बरामले जानकारी दिनुभएको छ । उहाँका अनुसार हालसम्म ५०० मत गणना भएकोमा जयराम लामिछानेले अग्रता बनाउनुभएको छ । यस्तै क्षेत्र नं. २ को सभापतिमा लोक मोक्तान र इश्वरनाथ पौडेलबिच प्रतिस्पर्धा भइरहेको छ । मोक्तान देउवा पक्षका हुनुहुन्छ भने पौडेल इतर पक्षको हुनुहुन्छ । क्षेत्र नं. २ मा कुल १ हजार ४२ मत खसेको छ ।
