हेटौंडाः नेपालको आर्थिक विकासको सवालमा नेपाल भारत बिच साझा अवधारणा विषयमा आज पत्रकार सँग छलफल भएको छ । नेपाल भारत मानव विकास एवं मैत्री संघका प्रमुख सूर्य भूसालले मकवानपुरका पत्रकारहरुसँग भारत र नेपाल विच विकासका साझा अवधारणाहरु के के हुन सक्छन् त्यसबारे छलफल गर्नुभएको हो ।
नेपालको विकासमा भारत छिमेकी देश भएपनि नेपालको दलको नेता, प्रधानमन्त्री बनाउन दिल्ली धाउने नेताहरुको कारण देशको विकास हुन नसकेको उहाँले बताउनुभयो ।
भारतले नेपालको विकासको लागि खर्बौ रकम सहयोग गरेपनि धेरै आयोजनाहरु नेपाली राजनीतिको कारण समयमा सम्पन्न हुन नसकेको उहाँले जिकिर गर्नुभयो । उहाँले प्रधानमन्त्री दिल्लीबाट तोक्ने, दलको नेता बनाइदिने प्रथालाई रोक्न सके भारत र नेपालले साझा विकासको धारणा बनाएर अघि बढ्दा धेरै विकास गर्ने भूषालको भनाई थियो । उहाँले जलविद्युत, पर्यटन, औद्योगिक, कृषि क्षेत्र लगायत भौतिक संरचनामा भारतले सहयोग गर्न सक्ने बताउनुभयो । पहिलेको जस्तै विद्यालय बनाइदिने, एम्बुलेन्स दिने भन्दा फरक सोच्न आवश्यक भएको बताउनुभयो ।
