हेटौंडाः हेटौंडा उपमहानगरको आयोजनामा विजया दशमी, दीपवली, छठ पर्वको अवसरमा आयोजित हेटौंडा रन प्रतियोगिता सम्पन्न भएको छ । आज बिहान हेटौंडाको बुद्धचोकबाट सुरु भएको हेटौंडा रन प्रतियोगितामा ४२ जनाले सहभागिता जनाएका थिए ।
हेटौंडाको बुद्धचोकबाट क्याम्पाडाँडा सम्म भएको ६ किलोमिटर दौड प्रतियोगितामा हेटौंडा–१४ को डेबिट मिजार प्रथम भएका छन् ।
यस्तै हेटौंडा–१३ को अम्रित सुनार द्वितीय भए भने सोही स्थानको शशी प्रसाद विश्वकर्मा तृतीय भएका छन् । उनीहरुलाई हेटौंडा उपमहानगरका मेयर हरिबहादुर महतले पुरस्कार वितरण गर्नुभएको थियो । प्रथम हुने मिजारले १५ हजार, द्वितीय भएका सुनारले १० हजार र तृतीय हुन सफल भएका विश्वकर्माले ७ हजार रुपैयाँ प्राप्त गरे ।
सिटी बजाएर हेटौंडा रन प्रतियोगिताको सुरुवात गर्दै हेटौंडा उपमहानगरका मेयर हरिबहादुर महत ।
दौड प्रतियोगितामा विजेता हुँदा आफुलाई गौरव महशुस भएको डेबिट मिजारले बताउनुभयो । यसअघि पनि विभिन्न दौड प्रतियोगितामा सहभागि बन्दै आएका मिजारले प्रतियोगिताले आफुभित्र भएको क्षमताको प्रदर्शन गर्न सहयोग पुगेको बताउनुभयो । आज बिहान भएको दौड प्रतियोगिताको हेटौंडा उपमहानगरका मेयर हरिबहादुर महतले सिट्टी बजाएर सुरुवात गर्नुभएको थियो ।
