हेटौंडाः बागमती प्रदेश सभाको नवौं अधिवेशन बोलाउन प्रदेश प्रमुख यादव चन्द्र शर्मालाई सिफारिश गरिएको छ । बुधबार बसेको मन्त्रिपरिषद्को बैठकले यही असोज २४ गते प्रदेश सभाको बैठक बोलाउन सिफारिश गरेको प्रदेश स्वास्थ्य मन्त्री प्रदीप कटुवालले जानकारी दिनुभयो ।
मन्त्रिपरिषद्को बैठकमा मुख्यमन्त्री अष्टलक्ष्मी शाक्यले विश्वासको मत लिने सम्बन्धमा भने छलफल भएन । यसैगरी प्रदेशमा भाडादर समायोजन बारे पनि बैठकमा छलफल नभएको मन्त्री कटुवालले बताउनुभयो ।
बागमती प्रदेशसभा असोज २४ गते आह्वान गरेर २५ गते मुख्यमन्त्री अष्टलक्ष्मी शाक्यले विश्वासको मत लिने तयारी भएको बुझिएको छ । यद्यपि प्रदेश सभालाई विश्वासको मत लिने भन्ने हालसम्म खबर नआएको प्रदेश सभा सचिवालयले जानकारी दिएको छ ।
